角色表

阿華

趙先生

（ 場景為烏托邦壹號單位內。）

（ 幕啟。）

（單位不大，四面全是牆，只有一盞燈、一道門及一扇細小的正方形窗，隱約有一些陽光照進空無一物的單位，有點像牢房的感覺。所有景物全以白色為基調。）

（故事發生在烏托邦壹號單位內，阿華引領着趙先生視察該單位。趙先生身形肥胖，穿了一件不太合身的裇衫，配置一條牛仔褲，有一種不協調的感覺。阿華則穿着一套整齊的西裝，看起來一副整潔的樣子。）

（ 燈亮。）

（ 阿華及趙先生進場。）

華： 歡迎嚟到「烏托邦壹號」。

（ 趙先生站在門口，望着這單位。）

趙： 嘩，我屌啊！

華： 趙生？！係咪間屋有咩地方唔滿意？

趙： 係⋯⋯

華： 啊，趙生，其實間屋唔錯㗎，唔啱仲有其他單位睇下 —

趙： — 係⋯⋯好撚滿意！

華： 滿意呢，我都好鍾意呢道，地方唔算太大，但係幾骨子，實用面積夠實用，就好似電視廣告話齋小小空間，大大宇宙。呢道就係你地嘅宇宙。

趙： 小小空間，大大宇宙？（ 阿華走到台中，幻想着自己的家）係啊，呢道要鋪一塊地毯，噉我就可以同阿仔喺呢道玩。地毯一定要綠色。綠色，好似草地咁舒服，玩到咁上下，我老婆就喺廚房出嚟叫我地食飯。「你地唔好玩啦，食飯啦，快啲過去食飯嘞。」（ 趙先生走到單位一旁）噉喺呢道要放張歐洲式嘅餐檯，我地就喺呢道食飯。 （裝吃飯）「老婆，今日啲餸好好食。喂，阿仔，唔好一味掛住食肉先得㗎，食下菜啦。」食完飯之後就同阿仔去露台數星星。 （走到窗前）「呢粒啊，火星啊！唔係呢粒啊！係呢粒。」之後就喺佢床邊講故事氹佢瞓覺。「從前有隻兔仔要同烏龜賽跑。」睇住佢瞓着之後，我就同老婆喺廳道睇下書、聽下歌、傾下偈，簡簡單單噉過。呢個就係我嘅烏托邦壹號。

華： 趙生，鍾唔鍾意呢道？

趙： 鍾意，好鍾意呢道，呢道就係我地嘅屋企。

華： 鍾意就好嘞，呢間屋個上車價只係要咁多啫，直頭係筍盤，真係好抵買㗎。（ 拿出計算機，向趙先生展示銀碼）

趙：   （望着計算機）無問題，報紙上面都寫得好清楚，阿⋯⋯

華： 阿華 —

趙： 即係華仔啦！華仔，雖然同你唔係識咗好耐，但係大家萍水相逢自己人，今日帶晒成副身家過嚟，一炮過畀晒佢，唔使煩。 （拿出紅白藍膠袋）華仔，同我點咗佢。

華： 趙生，你講笑咋？！

趙： 我似講笑咩？

華： 唔好玩啦！

趙： 邊個同你玩呀？

華： 真係決定買？

趙： 真係決定買！

華： 真係一炮過畀晒？

趙： 真係一炮過畀晒！

華： 成交？

趙： 成交！

華： Deal?

趙： 屌？

華：   在單位內興奮狂奔尖叫嘩！發嘞！發嘞！發嘞！有救嘞！有救嘞！黐線㗎！邊有咁順利㗎，趙生你真係我恩人，今次真係要開返枝香檳慶祝先得！（從公事包內取出香檳，像賽車手一樣慶祝）Wow ！呵啊呵～我眼睛想旅行！

趙： 搞咩呀？！

（ 阿華驚覺自己的浮誇行為，感到尷尬。）

華： 啊！唔好意思，一時太激動。

趙： 哈哈！我都好激動，終於買到我嘅烏托邦壹號。

華： 劇情會唔會發展得太快。

趙： 唔快㗎嘞，就嚟完場準備走添嘞。

華： 咁快？

趙： 睇啱就買㗎啦，要搞好耐㗎咩？

華： 睇啱就買，如果個個客都好似趙生你噉就好嘞。

趙： 啱就一句，唔啱就一句。我份人最唔鍾意拖泥帶水，婆婆媽媽噉，爽手啲先係㗎嘛。

華： 啱！趙生，噉呢間屋你係確定要買㗎嘛？

趙： 華仔，一句，買！我要買呢道！哈哈哈！

華：   拍手喝采好！

趙： 華仔，我鍾意你 —

華： 下！

趙： 份人夠有趣。我買得成樓你仲興奮過我，你話呢啲咁識得為人着想嘅經紀喺邊道搵？

華：   （尷尬地）哈哈哈！過獎嘞，趙生。

趙： 今日咁高興我地一於乾咗佢。（隨手拿下香檳）

華： 好啊！趙生，我去搵隻杯返嚟。（找杯子）

趙： 唔使杯啦，成枝「隊」先夠過癮㗎嘛。啊， 喝了一大口爽啊！嚟，華仔，飲勝。（把香檳遞給阿華，阿華無奈接過，望着酒瓶，不敢喝下）

趙： 華仔，唔飲唔畀面啊！乾咗佢！

華： 啊⋯⋯好嘅。（ 一喝而下）

趙： 噉先係㗎嘛。 （搶過香檳，一喝而下）

華： 趙生，係呢，你之前係住邊㗎？有無諗過賣咗之前嗰棟？

趙： 賣咩呀？嗰道租㗎嘛。咪就喺隔離嗰座「高樓大廈」道住。

華： 嘩！嗰道，嗰道個大堂好靚㗎喎，以前有好多客都鍾意佢個大堂。

趙： 我都係第一次聽人讚嗰道大堂好靚，哈哈哈！

華： 趙生，仲有個會所，個個都話正，有spa，又有戲睇，仲有個 gym 房 —

趙： — 會所？！我無聽錯呀？「高樓大廈」邊道有會所？哈哈哈！

華： 下？！趙生，乜你唔係住隔離嗰座樓高 77 層一梯四伙嘅高樓大廈「世界豪庭」咩？

趙： 我的確係住高樓大廈，不過就無世界豪庭喺後面，係樓高五層但係一梯 14張床位，我同老婆同個仔逼埋喺其中一張床嘅「高樓大廈」！

（ 停頓。）

華： 哈哈哈！又會噉都有嘅，搞錯咗添。唔好意思，阿趙生，我之前真係唔知你係住板間房 — （ 自知說錯話）

（停頓。）

趙： 哈哈哈！有咩所謂！住板間房咪住板間房，有咩好避忌！華仔，你知唔知，呢道啱啱起好嗰陣，我日日喺間房個窗仔望住嗰棟烏托邦壹號，喺道諗究竟幾時先可以住喺呢道，幾時先可以唔使再逼喺呢間板間房，有一個真真正正屬於我地嘅家？（喝下一口香檳）我不停噉唉聲嘆氣，怨天尤人，點解我條命生得咁苦。有一日我攤喺張床，望住嗰個遙不可及嘅烏托邦壹號，突然之間聽到一首歌 — （ 唱）「三分天注定，七分靠打拼，愛拼才會贏」。係喎，我無咗三分啫，但只要我堅持追返嗰七分咪都得囉。由嗰刻開始我咬緊牙關，日以繼夜，夜以繼日噉去奮鬥，相信只要堅持到底，肯搏肯捱，無嘢係做唔到。你而家無，唔表示你將來無，結果今日就畀我得咗，呢道就係我嘅「烏托邦壹號」！

（ 停頓。）

（ 阿華不知如何反應。）

華： 啊⋯⋯好，講得好，趙生，你呢個故事⋯⋯簡直係發人深省嘅勵志故事。

趙： 哈哈哈！華仔，我睇好你㗎，只要堅持就得㗎嘞。嚟！乾咗佢。

（ 趙先生把香檳遞給阿華，一喝而下。）