图片与音乐均来源于网络，侵删。

Pia  前必看

此本是根据去年底在香港上映的电影《正义回廊》改编而成，节奏偏慢 ，主要以细节刻画、故事线推理，讲述张显宗和唐文奇在寓所内残害父母的过程，案件进入法庭审讯程序后二人皆否认谋杀罪名。在一幕幕激烈的法庭辩论下，两位被告上演“天才”与“白痴”的戏码，真相越辩越模糊。不同背景的陪审员在休息室展开话语权的角力，同时陷入对与错的正义思辩中。总时长 2小时 ，走本时，着重参考张显宗的人物性格，以语言的节奏把握戏感；唐文奇属于智力低下，语言障碍是体现戏感的重要因素，自己把控，参考“肥猫“，兼角需要音色的转换，此人物难度较大。（国语版 本号：547713）

编 & 后  卡因.

统 筹     冷月

 文本校对 倾言_

    文本翻译   

倾言_、扶笑、白白胖胖的

熊猫、冷月、地心、大唐

特别鸣谢

粤语港社团 社长 V姊、柳如诗 大力支持

感谢试本 / 公演CV：鱼儿、冷月、喵、小金人、鱼尾闻的月、鼬顶不住了、高智派大星、泷小川

感谢干音CV：冷月、地心、白白胖胖的、Sodawater、Sabrina、雪雪、泷小川、小金人、湦汐、尧2、鱼儿、夜尸、喵、糊呀呀

角色分配

张显宗  兼  高思钧

唐文奇  兼  张显祖、麦兆雄、法官

吴冠峰   兼  张钊、何富

朱爱伦  兼  张权贵、李建成、事务律师、阚sir

游嘉莉  兼  古嘉欣、女律师

陈玉瑜  兼  孙艳娥、女记者

唐文珊  兼  郑家雯、法官助理

邵珮琼  兼  叶惠萍 、邓月平、贺敏儿、邵雪儿

 还原电影配置英文台词，走本前尽量熟悉台词，标注 [粤语] [英语] 的为 2选1 选项

 人物关系请看角色详情介绍，兼角尽可能变换音色，走本前可参考 TVB 粤语版电影。

6月3日 晚7点半公演

房间号：804366

第一幕

音效：海边石头落水声

新闻：（电台）2013年3月初，一男子报称父母失踪并于网上公开寻亲，引起广大关注，及后警方接获线报，指有人喺通讯程式中承认杀害自己嘅父母，经调查后证实系寻亲者张显宗...... - CV 鱼儿

音效：开门 0：32

音效：脚步声

张钊：咩味？

警员：系薰衣草味。- CV 地心

张钊：好香啊。

警员：（发现可疑）刀哥！（张钊外号）

音效：打开冰箱 0：45

[ 看到一对男女头颅 ]

张钊：（呕吐）

音效：转场警局 0：51

张钊：张显宗，宜家就张权贵同邵雪儿女士嘅谋杀案向你提问，你明唔明白啊？

张显宗：明白。

张钊：张权贵同邵雪儿同你系咩关系？

张显宗：张权贵系我爸爸，邵雪儿系我妈妈。

张钊：2013年3月1日上午，你同张权贵、邵雪儿去咗边呀。

张显宗：去咗大角咀美安街中美楼三楼B室，即系唐文奇先生嘅屋企。我同唐文奇冇择日，咁啱佢哋两个得闲，我哋又准备好喇，咁咪郁手啰。我同佢哋两个人讲，嗌佢哋帮帮手嚟睇我新租嘅单位，顺便清洁下，跟住我带佢哋嚟到客厅中间，唐文奇就喺厨房度攞咗把刀出嚟。我哋讲好咗边个近就杀边个，咁啱佢近邵雪儿女士，我近张权贵先生。

音效：闪回到2012年 2：00

唐文奇：我嚟 interview 㗎。

前台：先生，叫咩名啊？- CV 雪雪

唐文奇：唐文奇。

音效：坐下 1：57

唐文奇：你件西装边度借返嚟㗎？我就借唔到喇。

张显宗：不过宜家见工唔使一定着西装嘅，但你都冲咗凉先咯。

唐文奇：（闻自己身上的气味）

张显宗：得，你唔使咁紧张，我提醒你啫。睇下嗰啲人，惊咗你喇。

唐文奇：你好好人呀，好似。

张显宗：我系你咧，我就唔写落去喇，英文得E。

唐文奇：History 我就知，但呢个C字头呢点解呀。

张显宗：Criminal呀，即系问你，有冇犯过法？有冇畀人拉过上差馆？

唐文奇：之前我女朋友咧报警话我骚扰佢呀……

张显宗：得喇，呢啲嘢你唔洗同我交代。

唐文奇：你英文咁叻，边到学返嚟㗎？

张显宗：University of Melbourne 。

唐文奇：你外国返嚟㗎？佢哋实请你啦。

音效：开门 3：08

音效：脚步声

前台：Henry Cheung（张显宗），到你了。胡生，你来咗喇？咁你入嚟面试先啦。- CV 雪雪

张显宗：喂等阵！我嚟先㗎喎。

前台：你再等阵，呢位先生先面试。 我地嚟。

音效：闪回到2011年回忆 3：26

音效：多人脚步声

音效：众人坐下

女律师：签咗呢份合同呢，个手续就办妥㗎喇，咁嘉湖山庄单位嘅业权呢，现在正式由细佬张显宗先生让畀阿哥张显祖先生。

（停顿5秒来回看父母哥哥）

张权贵：喂，唔好宜家先嚟后悔喎？

张显宗：我想睇清楚啲terms啫。

邵雪儿：细佬呀，快啲签好，搞掂佢，去饮茶啦。

张显宗：你哋平时都冇咁早饮茶㗎。

张显祖：律师楼一年都做几百单㗎喇，唔使逐条check嘅。

张显宗：standard都会错嘅啫。

女律师：呃冇问题嘅，咁张生如果想睇清楚嘅话，可以返去慢慢研究下，咁我哋……

（显祖打断）

张显祖：唔使，你畀多几分钟我哋。

音效：闪回到2012年 4：18

音效：汽车驶过

音效：打开店门

张显祖：食咗嘢嗱？

张显宗：唔肚饿呀。（还哥哥西服）

张显祖：揾到工嗱？定系唔啱着呀？话咗你㗎啦。

张显宗：（低头继续打游戏）又输。

张显祖：过唔到咪冇玩住啰，夹硬嚟冇用㗎喎。

张显宗：边个话过唔到啫，氪金啰，9个9多十步。

张显祖：畀你过到咁又点啫？之后咪又系咁样，总系有两步你棘住棘住过唔到嘅，永远冇尽头。

张显宗：点啫？唔玩咯。

张显祖：嗰啲game公司最惊系乜嘢呀？放低佢，顺住佢嚟玩，自自然然就过㗎啦。

音效：打开店门 5：00

音效：走路声

音效：坐下

音效张显祖：你朋友呀？点称呼呀？- CV 糊呀呀

唐文奇：阿奇。（看着张显宗）仲系呢一关呀？

音效：闪回到2013年 5：14

音效：胶带录相机

女记者：我哋今日揾嚟两位失踪人士嘅细仔，张显宗先生接受我哋嘅访问。

张显宗：（磕磕巴巴）咁我系张显宗，呃，希望大家咧可以帮我揾我爹地妈咪，张权贵先生同邵雪儿女士嘅下落，呃，佢两个咧喺3月2号嘅时候失踪嘅，咁佢哋曾经话过，自己会返上大陆，但系到宜家都仲未返到，究竟佢两个去咗边咧？到咗宜家已经系十一、二日喇，仲系未有回音，我好担心呀。

女记者：咁警方有冇啲咩消息呀？

张显宗：额，咁警方嗰边咧就已经check过啲出境记录喇，额，就发现佢哋两个就系…冇离开过香港嘅，咁我哋可以做嘅都做晒喇，但系最后都会系冇回音，冇头绪嘅。

女记者：张生，我相信你爸爸妈妈一定会吉人天相。同时亦都希望电视机前嘅观众朋友，如果有任何关于呢两位老人家嘅消息，请立即同警方联络。

导演：好，停机。 - CV 尧2 6：28

张显宗：额，唔好意思，我想嚟多次。

导演：啊？再嚟一次？

张显宗：系，嚟多次。

助导：（悄悄话）佢当自己系男明星啊？再嚟一次。- CV 地心

张显宗：记者喎…咁唔专业嘅。

张显祖：今日辛苦晒大家喇，多谢。

张显宗：做咩啫，我头先漏咗句未讲吖嘛，你系咪唔想揾返老窦老母啫？

张显祖：阿爸阿妈我紧张过你啦，平时又唔见你咁孝顺？

张显宗：好啰，你自己孝顺，我乜都唔理。

张显祖：你约咗先同我讲，呢啲唔叫商量，呢啲叫通知。你搞到件事咁样，你有冇考虑过屋企人嘅感受呀？

音效：电话铃两声 7：14

邵珮琼：喂，阿宗？点呀，警察有冇讲咩呀？

张显宗：（电话音）不如你今晚出嚟我同你讲吖。

音效：压雷雨声入 7：24

邵珮琼：姑丈姑妈一定揾得返咖，唔好咁担心啦。

张显宗：（停顿2秒）系我杀㗎。

音效：键盘敲字 7：41

音效：敲门

张显祖：边个？

音效：开门声

张钊：差人！

张显祖：请问咩事呀？

张钊：我哋揾张显宗。

张显宗：（远处）揾我㗎。

张钊：我哋宜家怀疑你，2013年3月 1日，涉嫌谋杀男子张权贵、同埋女子邵雪儿，我哋宜家正式拘捕你。

音效：手铐 8：07

音效：拍照声

记者：阿Sir！阿Sir！ - 众CV

阚sir：我哋喺上址发现数个胶袋同埋呢啲防潮箱，箱入面我哋发现怀疑系人体嘅残肢，我哋亦都发现有数把刀同埋锯，怀疑系同呢单案件有关，而上面嘅血迹，令我哋有理由相信，上址就系第一凶案现场。喺调查嘅过程入面，有人同我哋透露，喺上址残杀咗一对六十多岁嘅夫妇，将佢哋肢解。

女记者：咁死者细仔系咪有份㗎？佢哋嘅杀人动机系咩呀？

记者：会唔会再拉其他人啊？- CV 尧2  8：48

阚sir：你哋谂嘢几天马行空喎。系咪睇得戏多啊？我老婆成日话我好似《警察故事》入面嗰个陈家驹，不过系三更半夜嘅时候。哈哈哈～

音效：记者拍照声 9：00

记者：讲多两句啦阿Sir！阿Sir咪走啊！- CV Sodawater

警员：大家唔洗担心，一阵咧会提供啲资料畀你们嘅。- CV 地心

女记者：佢哋有咩关系啊？

第二幕

狱警：02231，有人嚟探视你。 - CV 湦汐

音效：脚步声

音效：坐下 0：08

张显宗：我识你哋咩？

女记者：我哋想访问下你。

张显宗：好啊，但系你得十五分钟。

女记者：我想问你......（打断）

张显宗：你想问我点解要咁做？

音效：闪回到2012年 0：24

[ 街边小摊 ]

张显宗：有阵时我真系好想好似你咁，戆下戆下几开心。

唐文奇：（边吃面边说）你都得咖。

张显宗：好似我呢啲人，一系就好早死，一系就发癫，我谂过，我想三十岁之前自杀，我会喺屋企嗰度割脉，喷到成屋都系，到时间屋变咗凶宅，我睇佢哋点卖出去间屋。

音效：闪回到2015年监狱 0：55

[ 监狱探视 ]

唐文奇：（哽咽）你系唔系唔信我？我，我得返你一个㗎咋，佢哋屈我呀！屈我㗎。

唐文珊：你大个仔喇，唔识听家姐话系咪？你宜家出事了就嚟揾返家姐呀？同你讲过啦，点解啲人要痴埋你到啊？为乜嘢呀？觉得你蠢呀，想攞你着数呀。你嗰啲人真系当你系朋友呀？唔关你事㗎系咪呀？

唐文奇：家姐，我好惊呀。

唐文珊：家姐会谂办法。

音效：转场 1：36

音效：铁门打开

[ 唐文珊带来律师 ]

唐文奇：家姐…

事务律师：我系负责你呢单案嘅事务律师，我姓欧阳。

唐文奇：你好，大律师先生。

事务律师：呢位先系大律师，佢姓游。

唐文奇：家姐，请一个咪够咯，唔好嘥钱啊。

事务律师：唐生，你一定要经我哋呢啲事务律师，先可以聘请大律师，去到高等法院，系游大律师帮你辩护…

游嘉莉：钱呢方面，你唔洗担心，法援会帮你比晒，你一毫子都唔洗比。

唐文珊：游大律师，我知请你系好贵咖，（递过果篮）小小心意，唔成敬意，请笑纳啊。

游嘉莉：唔好客气。

唐文奇：游大律师，你唔仲意食啊？

游嘉莉：我哋冇咩时间喇，不如开始啦？

唐文奇：哦。

游嘉莉：关于案发当日，你仲记得啲咩呀？

唐文珊：游大律师，佢呢，呢度（指着脑袋）出过啲事，所以佢记性好差，唔记得嘢。

游嘉莉：录口供嗰阵时，佢记得好清楚㗎啵。

唐文奇：（情绪激动）我冇杀人呀！我冇杀人！答咗你，我冇啊！

游嘉莉：你同张显宗买刀又买雪柜，去杀佢阿爸阿妈喎？

唐文奇：冇啊…我冇咁做过啊…我冇啊…

游嘉莉：你仲同警方讲，话你哋一人杀一个添。

唐文奇：我冇啊…

游嘉莉：之后你再将佢哋肢解，最后揼咗落海。

唐文奇：（哭腔）我唔知呀！唔关我事呀，我冇做过呀。

游嘉莉：‘我唔知呀？唔关我事？’

唐文奇：（激动捶桌子）好，你哋屈我呀，你哋即管屈我呀，我冇做过呀，真系冇呀！

事务律师：唐生，如果你控制唔到情绪，上到庭，会好影响法官同陪审团对你嘅印象。

游嘉莉：（拍了拍欧阳）冇事。可能傻人有傻福呀。

唐文奇：（哭）家姐…佢哋屈我呀…

唐文珊：我知... 我知...

音效：转场 3：51

音效：铁门打开

[ 张显宗的律师 ]

事务律师：请坐，呢位系吴冠峰，吴大律师。

吴冠峰：（打开薯条）一齐食呀？要唔要？敏儿，有冇带…

贺敏儿：哦。

吴冠峰：你知唔知呀，佢妈咪自家制嘅嗰个沙茶酱，真系好味啫真系。哇，你攞去卖呀嘛，揾到钱㗎真系。

张显宗：你系嚟食嘢呀？定系嚟做嘢㗎？

吴冠峰：我哋嚟梗系食嘢啦，食完嘢，有力咪做嘢啰。

张显宗：就算你觉得我有罪都好，无罪推定原则，每个人都应该有公平嘅审讯权利呀嘛。

吴冠峰：（转头对敏儿）无罪～推定～原则～，有冇抄低呀？学嘢啦，呵呵。你睇下条片入面嘅呢条友，（张显宗寻亲视频）几咁黑人憎呀，系咪呀？你睇下我直头想窝佢一锤添呀。

张显宗：你唔使睇呢啲嘢啦，你嚟，系帮我谂办法，谂解决方案嘅。

吴冠峰：所以我咪过嚟帮你执手尾啰，本来你以为可以瞒天过海，不过你叻唔切啦，比差人捉到，跟住自己个剧本又写唔落去，于是乎宜家搞到最后烂尾，于是我宜家嚟帮你补拍呀，大佬，呵呵呵，你以为你真系咩天才罪犯啊？《Catch me if you can》入边嗰个迪卡比奥呀？

张显宗：Frank Abagnale，迪卡比奥做嘅嗰个系模仿天才。

吴冠峰：迪卡比奥，呵…  你依家似《Titanic》入面就嚟浸死嗰个迪卡比奥呀。3月2号，你阿爸阿妈已经过咗身㗎喇，你根本冇同佢哋饮茶，你知啲差佬怀疑你，于是你乱点啲差佬去查CCTV拖延时间，然之后你就喺Whats App自爆，跟住又约埋表姐去玩自首，（转头对欧阳）点解佢要咁做呀？太介意人哋点睇佢啰，要面啰。哎，我真系帮唔到你呀，讲真，一系咁，拜托你，合埋你把口，唔好笑。（转头对欧阳）喂，呢间嘢我真系去过好多次，佢啲嘢食系ok㗎，但唔知点解啲评分得一两粒星喎？你知唔知点解呀？就系因为佢哋嘅服务态度，佢哋嘅服务态度就系冇乜服务态度，你做食肆，食品好就固之然啦，关键在于服务态度，你一系好好服务态度，一系你好差服务态度，越黑人憎越好。喂，张先生，你都试下？越黑人僧越好，话唔埋杀出一条血路。真㗎，系咪先？（转头对敏儿）喂，几点呀宜家？你嚟食嘢定做嘢㗎？我哋不如开始啰，好冇呀？

第三幕

音效：开门

游嘉莉：早晨。

吴冠峰：早晨。

庭助：court（开庭）！ - CV 冷月

音效：起立鞠躬坐下 0：16

法官：本庭需要组织一个陪审团，审理一宗谋杀案，两位被告宜家坐喺犯人栏入面。挑选陪审员嘅程序，宜家开始。

法官助理：两位被告请起立，我一阵读出嘅人名，将会成为本案嘅陪审员，如果你哋反对佢哋其中任何一位出任陪审员，就一定要喺佢哋宣誓前提出，明唔明白？

音效：新音乐起 0：43

法官助理：12号孙艳娥。

孙艳娥：法官阁下，呢个系公民责任，本人非常乐意。

法官助理：16号郑家雯、20号李建成。

李建成：法官阁下，我想申请豁免。其实我真系一早就买咗张机票，同我女朋友去旅行庆祝拍拖周年纪念。

法官：张机票上个礼拜先买㗎喎，上个月法庭已经发咗传召信比你，你仲买机票？你哋有冇问题呀？请你过去嗰边。

法官助理：2号何富、1号麦兆雄、5号古嘉欣。

古嘉欣：呢啲暴力血腥嘅嘢，我睇完夜晚会训唔着觉㗎。

法官：训唔到觉？大个女喇，系时候考验下自己。

法官助理：11号高思钧。

高思钧：法官阁下，我根本就唔信香港嘅习法制度。

法官：你唔洗讲得咁大，信唔信，服唔服都好，你都要留喺到。

法官助理：15号叶慧萍。

叶惠萍：我唔系好适合做陪审员，我成日睇错嘢啦，又大头虾。

法官：你从前做老师㗎喎，比啲信心自己。

法官助理：两位被告，对于啱啱组成嘅陪审团有冇异议？

张显宗：冇问题。

唐文奇：冇问题。

音效法官：两位大律师，有冇问题？- CV 湦汐 2：05

游嘉莉：冇问题。

吴冠峰：冇问题。

法官：本席喺度重申多次，担任陪审员系公民嘅义务，无可避免，会影响到工作同生活，但系大家唔好觉得被选中系一件不幸嘅事。

音效：转场后庭陪审室 2：30

叶惠萍：你做咩工㗎？

何富：我退咗休㗎喇。

李建成：系…系…三、六、八，复旦全拖，二十蚊一注。

郑家雯：（同入）大家不如专心少少呀？

李建成：（同入）哎，唔好咁讲，有赚有赔吖嘛。

郑家雯：先选咗个主席佢先啦。

何富：好啊选，嚟坐坐坐坐。

高思钧：其实所谓陪审团主席，都只不过系最后一日，负责宣读结果㗎啫。

何富：边个做都一样啫，你哋求其揾人顶咗佢咪得啰。

郑家雯：啊“乜”生，点解系你哋呢？你冇份嘅。

何富：我姓何，单字一个富。

麦兆雄：何生呀，你坐正个主席位，不如你做啊？

音效：起身椅子滑动 3：17

何富：哎哎哎，唔系唔系，你嚟你嚟，我～我真系做唔到呢个。啊妹，定细佬啊？唔好意思我唔够眼呀，你咁醒目，不如你做呀？

李建成：揾个小朋友做？代表唔到我哋喎？

孙艳娥：一系你做呀？够晒稳重啊。

高思钧：哼，佢啱啱先同个官讲话自己唔想做咋啵，连机票都买埋。

李建成：细路，唔好讲到我咁自私，97年前我啲朋友全部走晒，系我喺度留港建港㗎，我揾到啲钱啰，想同屋企人去享受下唔系唔得啊嘛？其实边个想嚟做埋呢啲嘢先得㗎，唔通真系为一天八百几蚊啊？

古嘉欣：啊？乜原来有钱收㗎？

何富：封信有写。

古嘉欣：哦yes。

李建成：不过咁，既然嚟都嚟咗啦，咁我都可以代表下大家嘅。

何富：有人认头，搞掂啦。

古嘉欣：我冇意见啊，难得呢位阿叔咁英勇。

郑家雯：我唔赞成，你咁赶时间，万一我哋未倾完你就话要表决咁点呢，我好难先选得中㗎。

李建成：靓妹，宜家都未开始就咁偏激，点倾落去啊？

高思钧：争下点啫，又倾又争啰笨。

叶惠萍：讨论系好事嘅，不过我哋系对人定系对事呢？今日先至系第一日，我哋应唔应该就咁带住情绪就咁继续讨论落去呢？

孙艳娥：您点称呼啊？

叶惠萍：哦，我姓叶。

孙艳娥：你真讲啱我心里嗰句说话，嗱，我哋要和平、理性、非暴戾。

麦兆雄：我哋咁样唔会有结果㗎，不如咁啊，免伤和气，我哋投暗票决定啊？

何富：好哇。（同入）

孙艳娥：好哇。（同入）

音效：纸张声 5：12

孙艳娥：麦生，你有五票，辛苦晒啊。

第四幕

音效：音乐起入

吴冠峰：真系多谢你呢班尊贵嘅资深大律师呀，唔肯接呢啲笋嘢，我哋呢啲散仔先至有得捞下。

游嘉莉：我咪接咗咯。

吴冠峰：同我交换咯，好唔好啊？

游嘉莉：你咁热心打慈善赛，我呢方面真系唔及你㗎。

吴冠峰：喂，Alan成日讲winners take all（赢家通吃）啊！咁点啊？输一半当输晒咯喔？

朱爱伦：你冇听过“西点军校”嘅一句话咩？！“Sir. No excuse, sir！”

庭助：court（开庭）！ - CV 冷月 0：36

音效：起立鞠躬坐下

法官：你哋有无嘢要倾咗先？

朱爱伦：法官阁下，我留意到今日有份杂志，报道咗第一被告嘅访问，内容有misleading嘅成分。放心，律政司已经安排陈大状跟呢单嘢喇。

法官：得，一阵间我同陪审团讲。

朱爱伦：但呢单嘢好严重㗎噃，会直接影响到陪审员对案件嘅感觉……

法官：（打断）诶，啱啱我咪话咗我会处理咯。

音效：闪回监狱探视节奏慢  1:10

女记者：我想问咧……

张显宗：（快速打断）你想问我点解要咁做？……你哋可以话我系唔正常。……可能系我细个同埋我青春期嘅经历，令到我个人……有精神病咯。普通人咧，会有开心同埋唔开心嘅记忆，但系我咧？我只系记得啲唔开心嘅嘢。

女记者：有好多人话，你系因为钱而杀死你爸爸妈妈嘅？

张显宗：唔系你哋谂咁嘅。我10岁之前，我阿爸成日打我阿妈，打到我阿妈缩埋一边哭，然之后打完我阿妈就打我阿哥。我细个想打篮球，但系佢唔畀，佢逼我学琴，搞到我发育得差，生得矮。之后喺澳洲读书，我又畀班黑鬼围殴，打到我濑屎，（挑眉）是真系濑屎喔，呵…

女记者：就因为咁样？

张显宗：应该咁讲（思考）……我直头感觉唔到咩系开心。（沉默笑）我咩都feel唔到。

女记者：你可唔可以讲下你杀人嗰阵嘅心情啊？

张显宗：（盯着记者沉默2秒）画面……好震撼……

音效：转场法庭  2:31

法官：鉴于本案嘅审讯，系涉及另一宗妨碍司法公正嘅案件，陪审员可能睇过相关嘅报道，我提醒陪审员唔好畀报道啲内容影响咗你哋嘅判断。你哋只能够根据庭上控辩双方嘅举证嚟决定。

法官助理：案件HCCC389_2015_张显宗_唐文奇。

法官：陈大状，你可以开始。

陈玉瑜：警方于2013年3月15号，喺西营盘第二街东园东祥阁1楼A室里面拘捕第一被告张显宗。并根据佢嘅口供，喺大角咀美安街中美楼三楼B室单位入面，发现两位死者张权贵同埋邵雪儿嘅人体残肢，并即场拘捕第二被告唐文奇。张显宗被拘捕之后，喺警诫口供里面承认杀害张权贵同埋邵雪儿，并透露佢同第二被告，早喺半年之前，已经开始筹备杀人计划。

朱爱伦：法官阁下，跟住落嚟，会播放第一被告张显宗同警方嘅录影会面。

音效：投影设备启动同入 3:50

张显宗：（留声机音）嗰日我带咗张权贵先生同邵雪儿女士去咗大角咀美安街中美楼三楼B室，即系唐文奇先生屋企。我同唐文奇先生无择日嘅，咁啱佢两个老人家得闲，我哋又准备好喇，咁咪做咯。

音效：闪回2013年案发现场 4：12

音效：开门声

张显宗：系呢度喇。呢个我同屋主阿奇。

张权贵：哇！呢度几多十年楼啊？霉霉窦窦咁样嘅。

邵雪儿：都算几光猛吖。

张权贵：又西斜，窗花又烂，点住人啊？

音效：刀刺入 4:31

邵雪儿：（被捂嘴）唔~唔~

音效：刀刺入

张权贵：啊啊~（抵抗）啊~啊~救命啊！

张显宗：过嚟帮拖啊！

唐文奇：咦呀啊啊~

张显宗：（被唐误伤）啊啊啊~

音效：关出租车车门 4:46

张显宗：去玛丽医院，（疼）啊~

音效：闪回2013年警局 4:56

张显宗：唐文奇先生佢过咗来帮手，但系佢意外咁样整伤咗我大髀，不过最后我哋都搞得掂。我哋仲谂过一齐返大陆，捉啲妓女嚟杀。

张钊：你杀咗人，之后有咩感觉？

张显宗：冇乜感觉。我只脚受咗伤流咗好多血，我净系想快啲搞掂佢啫。我想佢两个快啲消失，横掂佢哋做人都唔知自己为乜。

张钊：咁你自己又知道想点咩？

张显宗：我知道我唔想畀人睇唔起。呢样嘢唔系咁容易改变到嘅，不过我想试下。

张钊：嗰啲尸体边个处理啊？

张显宗：系唐文奇先生佢叫我返西营盘屋企先嘅。佢话如果唔系嘅话，就会畀人怀疑。佢话佢搞得掂喔。我哋跟住嗰啲联络都系用电话储值卡联络嘅，我建议佢买嘅。

音效：电话铃两声 6:00

张显宗：喂，点啊？

唐文奇：我唔搞喇……

张显宗：有几难搞啫？天将降大任于斯人也，必先劳其筋骨，饿其体肤……

唐文奇：（打断）系咯！嗰啲骨我搞唔掂啊，（咬牙用力斩）斩极都斩唔开啊！妖~唔搞了！

音效：闪回到警局 6:29

张钊：你几时先返到去？

张显宗：嗰几日我都留喺西营盘嗰度，直到3月5号我先至返翻大角咀。

张钊：咁你咁放心畀唐文奇一个人处理嘅？

张显宗：咁其实我冇乜所谓。我衡量过佢有呢个能力，我先至畀佢做嘅。（停顿3秒）不过佢最尾话搞唔点，都系要我返去帮手。

张钊：咁你返到大角咀案发单位之后点呀？

张显宗：唐文奇先生话已经将两个头放咗喺雪柜嘅冰格嗰度，咁嗰度得翻好少位，于是啲内脏就放喺下格，其他唔够位嘅就放咗喺防潮箱嗰度。哦，系啦，佢叫我唔好打开雪柜，话惊会好臭喔。

张钊：咁你点处理？

张显宗：咁我哋就将部分嘅残肢，用垃圾胶袋包咗四、五份，然后放落背囊嗰度，再踩单车出去海旁嗰度抌（dem2）咗。

音效：闪回到2015年法庭 7：43

音效：递资料

游嘉莉：法官阁下，我想申请喺准备畀陪审团睇嘅证物相里面加一张案发现场嘅相，证物D21。

法官：我认为朱大律师需要睇一下呢张相先。

朱爱伦：张相有啲……令人不适，陪审员睇完可能会觉得有啲……唔舒服。

游嘉莉：我明白。但系呢张相对于案情好重要，陪审团有责任去感受一下，当时见到呢个景象会系咩感觉。

吴冠峰：法官阁下，我都赞成。

法官：可以畀陪审员睇。

法医：喺案发单位入面，我地发现咗20几块已经开始腐烂嘅人体残肢，我们唔可以以尸体嘅状况嚟确定两位死者嘅死亡时间，原因系残肢曾经被冷藏、畀盐腌制过、仲畀微波炉加热过，以环境证供推断，死亡日期系2013年3月1号。另外，两位死者嘅死因确定唔到，因为遗体冇办法还原。- CV 小金人  8：26

音效：转场后庭陪审室 8:54

麦兆雄：饮啖水先吖。

古嘉欣：（看完照片后不适）唔该晒。

李建成：喂，你哋搞掂就过来继续倾啦！我约咗个马主朋友，今晚入场食饭噶。

古嘉欣：（喝完水）OK喇，唔该晒！

李建成：心血少就唔好睇啦嘛。

叶惠萍：古小姐都系尽责啫，我哋应该鼓励下佢嘅。你个人有冇同理心嘅咧？

李建成：喂！咁你即系话我好似两个被告咁无人性啊？

何富：宜家啲后生呀，无晒孝义噶，杀自己父母都做得出！

孙艳娥：总之咧，天下无不是之父母。

李建成：佢好彩，香港唔使打靶。啊，其实香港咧，根本就唔应该废除死刑啊。

郑家雯：天下系有不是之父母噶。有啲父母虐待仔女，遗弃仔女……好多呢啲新闻嘅。

李建成：望下佢个样。一望就知道系个loser啦，咩都怨。

郑家雯：揾唔到钱就畀人话系loser，呢个游戏公平嘅咩？

高思钧：其实呢个世界咧，有4%嘅人系毫无良知嘅，呢啲人系有反社会嘅人格。佢唔会觉得自己做错事，就算做错都系人哋逼佢嘅。举个例吖，希特拉。

何富：诶，张显宗啊，佢咪崇拜希特拉嘅咯。

郑家雯：你点知噶？

何富：佢自己讲噶嘛！

所有人：啊？

郑家雯：唔系啩？

何富：我睇杂志睇翻来嘅。

郑家雯：有冇搞错啊？

何富：喂，我饮茶唔睇报纸杂志，唔通玩手指咩？

麦兆雄：啊，何生啊……

何富：咩啫？我做陪审员之前睇噶。

古嘉欣：但系本杂志咧，今期啱啱先出噶喎。

郑家雯：咁即系你又有睇咗喔？

叶惠萍：虽然系唔犯法……但系我都忍住冇睇嘅。

李建成：不过我收到风，系佢亲口同啲记者讲佢几憎佢老窦老母嘅。呐，畀老窦老母闹两句就话系虐待。佢食紧嘅、住紧嘅、着紧嘅，系边个畀佢噶？唔好讲话“养儿防老”啦，简直系“养狼狗咬春袋”啊！

音效：闪回监狱探视节奏慢 11:19

女记者：可唔可以细节啲，讲多少少详细？

张显宗：一般人会有同理心，用刀㓤（读“吉”）落人哋嗰度，知道人哋会痛，所以会缩手。但系我咧，喺呢方面我差少少。

女记者：你有咩同你父母讲？

张显宗：（笑）点讲啊？问米咩？

音效：闪回2015年法庭、后庭穿插节奏紧凑 11:51

朱爱伦：（小声）Show time。

陈玉瑜：警方喺现场检取嘅物证包括4把牛扒刀、1把切肉刀、1把削骨刀、1把锯……

叶惠萍：搵到好多嘅工具添，有锤仔……

陈玉瑜：13支空气清新剂、7樽用完嘅漂白水……

叶惠萍：有砧板、……

陈玉瑜：8包沙、17包英泥、两个工业用眼罩、同埋……

叶惠萍：615个发泡胶盒，仲揾到好多嘅残肢。

古嘉欣：哇！原来有咁多嘢噶？

麦兆雄：其实咁多架撑，两个人都用唔晒啦。

朱爱伦：个重点已经唔系呢啲工具嘅用途，而系呢啲工具究竟系一个人用？定系两个人用？如果杀死两位死者嘅只系一个人，需唔需要准备咁多嘢咧？

叶惠萍：你讲紧嘅系“佢”吖，定系“佢哋”啊？

陈玉瑜：案发大厦中美楼冇安装闭路电视，但附近铺头嘅闭路电视就记录咗张显宗同父母沿大角咀道步行去中美楼嘅过程。三个人最后出现喺一个油站，时间显示系11点45分。之后同日嘅中午，玛丽医院急症室嘅闭路电视拍摄到，张显宗去求医嘅时间，系12点22分。由中美楼去到玛丽医院最快嘅车程都要19分钟。所以可以合理推断，张显宗当日逗留喺案发单位嘅时间系不足20分钟。

古嘉欣：其实咧，我都唔明，嗰个肥仔张显宗，点解要帮佢？

郑家雯：肥仔系唐文奇啊！

古嘉欣：我意思系，嗰个肥仔唐文奇，点解要帮佢咧？

朱爱伦：现场有一本红黑色嘅笔记簿，里面有写点样将人体放血、解剖，而且列明咗购买凶器嘅数目。

何富：好人好姐边会同啲打靶仔玩埋一堆喔。

孙艳娥：哦，咁又真喔，近墨者黑。

麦兆雄：或者畀人洗脑、煽动？

朱爱伦：警方喺案发现场发现一张，写咗12个电话号码嘅纸条，同第一被告张显宗身上搜到嘅一样。哈，咁啱嘅！

叶惠萍：大家可唔可以唔好咁武断咧？其实第二被告都未讲任何嘢噶。未审先判？

朱爱伦：喺3月1号至到3月13号期间，两名被告喺涉嫌杀人之后有73次通话记录，而最长嗰次有30分钟……一间超级市场嘅闭路电视录低咗第一被告同第二被告一齐买4把牛扒刀嘅过程。喺唐文奇嘅电脑里面，揾到佢同张显宗嘅 MSN 通话记录，Henry Cheung系第一被告张显宗，而Angus Tong系第二被告唐文奇。喺2012年10月16号，佢哋讨论过用化学物质丙酮进行杀人部署。

音效：转场后庭陪审室 15:04

高思钧：其实咧，陪审团嘅制度系来自英格兰嘅，以前嘅国王会要求十二骑士去发誓，唔放过任何有罪嘅人……

孙艳娥：啊高sir，如果要我上你嘅历史课咧，我谂我要减你人工㗎。

郑家雯：如果企喺犯人栏入面嗰个系你，你系信人，定系信个制度咧？

李建成：咁制度咧系可以改嘅嘛。

高思钧：制度系可以改，但为咗私心改嘅，嗰啲叫权术。

叶惠萍：咁我作为陪审员嘅话，我哋要讨论几多？同埋要谂几多至足够咧？

高思钧：其实喺十四世纪嘅时候，已经有逻辑学家提出一套叫“奥坎剃刀”嘅理论，系讲呢个世界所有现象嘅解释，背后都存在更多更为复杂嘅变体。去到最后得到结论嘅时候，呢啲假设可能太多，或者好多人觉得系多余嘅。所以比较简单嘅理论，其实系比复杂嘅理论更好。因为好多人都系贪方便，简单嘅理论往往都系比较容易验证嘅。就好似我用一把剃刀咁样，剃走晒啲无谓嘅假设。

何富：喂，佢用切肉刀喔，唔系剃刀喔！

郑家雯：哈哈哈……

叶惠萍：咁即系我哋唔应该提出太多嘅假设性啦？

高思钧：系相反。就算有无尽咁多嘅假设，我哋都应该用更多嘅心力。因为法律系相信“无罪推定”、“疑点利益归于被告”，冤狱系比放过有罪嘅人更加唔公义。

第五幕

音效：汽车驶过

音效：雷雨声

庭助：court（开庭）！ - CV 冷月

陈玉瑜：法官阁下，我想传召第一被告，张显宗嘅哥哥张显祖上庭作供。

朱爱伦：作为被告张显宗嘅哥哥，请你形容一下被告同你嘅关系。

张显祖：普通。

朱爱伦：普通？点普通？有没过咩嘢拗撬，嘈交嗰啲嘢？

张显祖：我同佢冇。

音效：闪回2013年 0：32

张显祖：差馆打电话来，话有人打电话去银行check阿妈嘅户口。

邵珮琼：系我打去嘅。

张显宗：我叫表姐打嘅。

张显祖：你分分钟犯法噶，你到时搞到你表姐啊。

张显宗：有事我孭咯。

张显祖：你孭的晒咩？

音效：闪回2015年法庭 0：50

朱爱伦：张显宗同爸爸妈妈咧？

张显祖：间钟…同我妈有。

朱爱伦：咩嘢原因呀？

张显祖：有时候因为钱。

朱爱伦：你觉得你细佬为咩事要杀自己父母？

张显祖：我唔知道，最近我先发现自己，原来完全唔理解佢。

朱爱伦：2013年3月13号，亦即系案发之后，你同第一被告喺你屋企附近派传单。

音效：闪回2013年 1：25

邵珮琼：我哋一家人来㗎，唔好嘈啦，阿宗都系想快啲搵到姑丈姑妈嘅啫。

张显宗：唔派了，走啦。

邵珮琼：咁你翻上楼上定系去大角咀啊？

张显祖：做咩去大角咀啊？

张显宗：我同阿奇喺大角咀租咗个窦。

张显祖：边个系阿奇？

张显宗：你话人哋低低哋嘅嗰个肥仔啊。

张显祖：你租楼咁大件事你都唔同我商量嘅，阿妈阿爸知唔知噶？

张显宗：知啊，佢哋冇同你讲咩……其实我都想你上嚟坐下。

张显祖：宜家阿妈阿爸唔喺度咧，你有啲乜嘢事都系可以同我讲噶，我哋系两兄弟来嘅嘛。

音效：闪回2015年法庭 2：07

朱爱伦：嗰阵佢邀请你上去大角咀嘅住所，即系凶案现场，有冇咁嘅事？

张显祖：有。

朱爱伦：张权贵同邵雪儿即系你爸爸妈妈，佢哋嘅尸体残肢，当时仲喺单位度，你认为佢叫你上去做咩呀？有咩目的?

吴冠峰：法官阁下，控方引导证人作不必要嘅猜测。

朱爱伦：法官阁下，我系根据已经发生嘅事实去问嘅。

吴冠峰：咁呢啲主观感受，有用嘅咩？

朱爱伦：证人感受系可以反映出一啲客观嘅情况，特别系勾起证人一啲回忆，等到大家更加了解被告当时嘅态度。

法官：朱大律师请继续。

朱爱伦：张生，请继续。

张显祖：嗰日之后我有谂过，佢好可能想对我不利。

朱爱伦：法官阁下，我冇其它问题喇。

张显祖：不过...到最后，嗰日佢...都冇叫我上去。

音效：闪回2013年 3：15

张显宗：阿哥！

张显祖：做咩啊？

张显宗：今日都系唔过去咯，第日先算啦，累喇。

张显祖：哦。

音效：闪回2015年法庭 3：29

吴冠峰：据我所知咧，喺2008年第一被告张显宗，同你夹份买咗一个家湖山庄嘅单位，请问层楼嘅首期系点嚟嘅？

张显祖：阿爸阿妈畀嘅。

吴冠峰：咁宜家层楼系咪仲属于你细佬嘅？

张显祖：唔系，宜家业权系我嘅。

吴冠峰：啊，点解呢？

张显祖：当时佢炒股蚀咗好多钱，层楼随时断供，所以我接手。

吴冠峰：咁点解佢唔嗌你哋帮下手，而系卖咗层楼比你哋嘅？

张显祖：阿爸惊佢破产连层楼都冇埋，所以畀一笔钱佢还债，然后将佢嗰半过咗畀我。

吴冠峰：哦，所以唔系佢冇叫，系你哋冇睬佢啫系咪？

张显祖：当日时候银行出信话要收楼，佢都唔好好揾份工去做。

吴冠峰：咁所以由佢死咯嗬。对大部份香港人嚟讲，冇咗层楼系惨过死嘅，你咁样对你嘅亲生细佬，你觉得佢承唔承受到呢啲打击呀？对你嚟讲你应该承受度呀，你硬净，但佢未必喔。你哋两个好似喺澳洲留学嘅系嘛，你毕到业，佢毕唔到，佢成日喺学校度，受到嗰啲黑人即系嗰啲非裔同学欺凌，你知唔知有啲咁嘅事㗎？

张显祖：知少少。

吴冠峰：送佢去外国读书，读不成书又送佢返嚟，咁然之后帮佢卖咗层楼，搞到佢连砖头都冇埋，你作为佢宜家唯一在世嘅亲人，你咁样对佢，佢嘅精神状态承唔承受到㗎？

张显祖：我唔清楚。

吴冠峰：我绝对冇怀疑过我当事人嘅父母，对我当事人嘅爱，但系讲到爱，从来…都未必一定系双方，亦都唔可以勉强。我当事人畀人控制住，佢连个财产都畀人控制住，既系生命财产被人控制，唯一嘅目的就系希望呢个年轻人，永远翻唔到身。管教呢一把尺无论系长定短，软定硬，有一个量度标准一定要坚持到底，就系爱。冇咗呢个量度标准打低嘅话，呢一把尺系只会教出愤怒嘅下一代。法官阁下，我冇嘢讲喇。

音效：闪回监狱探视节奏慢  5：59

女记者：你有冇嘢想同你阿哥讲啊？

张显宗：佢一个朝头早，冇咗三个亲人，我未知点样同佢解释。

女记者：咁你有冇后悔？

张显宗：如果可以返转头嘅话，我谂我未必会咁做。

女记者：你唔系讲过你冇同理心咩。

音效：闪回2015年法庭  6：24

邵珮琼：本人仅对全能上帝宣誓，本人所作之证供，均为真实，及为事实之全部，并无虚言。

吴冠峰：作为我当事人张显宗嘅表姐，你同佢由细玩到大，你觉得佢喺屋企开唔开心？

邵珮琼：我觉得佢唔太开心。

吴冠峰：啊邵小姐或者咁样啦，开唔开心都好主观嘅，你可唔可以举一啲例子，点解你会有咁嘅感觉？

邵珮琼：佢细个嗰时根本唔中意学琴，佢想打波，但系姑丈姑妈一定要逼佢学琴。

吴冠峰：其实男仔中意打波都好正常啫，咁张显宗可以反抗个噃。

邵珮琼：佢有。

吴冠峰：咁你姑妈姑丈，即系我当事人张显宗嘅爸爸妈妈点反应？

邵珮琼：会打佢咯，喺佢细个嗰时。

吴冠峰：呃，根据证物 D 8，我当事人喺 Xanga 里面系咁样讲噶：“又一个嫌我矮嘅人出现，我好憎人睇唔起我嘅高度，对于呢个缺陷，我自己都好唔开心。”张显宗有冇同你倾过呢件事咧？

邵珮琼：有，我都有劝过佢唔好咁谂，但系佢始终都系睇唔开。

吴冠峰：根据证物 D 8 ，Xanga 里面嘅第二段：“就系因为咁，我中学同大学没有选择，到咗最后都系自己一个人度过，好孤独同忧郁，捱过那些令人精神崩溃的时间，最后今日的我要北上大陆去揾女朋友，我觉得自己好冇用”。你觉得我当事人张显宗点解要揾你出来剖白咧？

邵珮琼：佢信任我。

吴冠峰：咁即系话，佢需要一个信任嘅人去听佢倾诉。

邵珮琼：嗰晚之后，佢 send 咗个 message 畀我，佢话喺揾姑妈姑丈嘅哩段时间里边，感受到我同佢哥哥对佢嘅关心，佢觉得佢冇再咁憎恨呢个世界喇。

吴冠峰：你觉得佢系咪真系咁谂咧？

邵珮琼：喺嗰一刻，我相信他。

吴冠峰：法官阁下，我冇嘢喇。

法官：有冇复问？

音效：咳嗽  8：53

朱爱伦：第一被告系一个唔诚实嘅人，你同唔同意？咁佢有冇讲过点解要自首？

邵珮琼：佢觉得佢哥哥系时候要知道晒成件事。

朱爱伦：佢讲嗰阵个样系点噶，系咪寻亲电影入边嗰个呃晒全香港人嘅笑容，你系咪觉得佢利用你对佢嘅关心？

邵珮琼：嗯。

音效：转场后庭陪审室  9：30

何富：其实佢老窦老母百年归老之后，啲钱唔系又系佢两兄弟嘅。

叶惠萍：但系佢阿爸阿妈开口埋口都冇关心过佢，根本完全唔知道佢想要咩㗎噃。

古嘉欣：所以我觉得呢，吴律师喺庭上边真系讲得好有道理。

孙艳娥：其实呢，佢如果唔系行差搭错咧，人生都应该几美好嘅系嘛。

郑家雯：你谂下，如果一出世就被人控制住，做呢样又唔得，做嗰样又唔得，咁好难唔反抗㗎啫。

李建成：你嘅意思系咪即系话，我帮你畀首期，跟住唔帮你供，你就要怼冧你老窦老母？

麦兆雄：我哋喺度讲紧张显宗点解杀人，你呀净系讨论钱？

李建成：麦生，你系咪认同呢啲咁大逆不道嘅行为呀？

麦兆雄：我冇认同佢，我系尝试理解佢点解杀人。

李建成：总之同情呢啲人嘅咧，就禽兽都不如咯。

高思钧：其实我哋唔系喺度质疑紧张显宗杀人呢件事，而系怼紧佢，你谂下，我哋越理解佢点解杀人，咪即系越肯定佢有杀人动机，呢啲咪谋杀咯。

第六幕

庭助：court（开庭）！ - CV 冷月

精神病医生：喺案发前嘅一个月，张显宗每一日都重复听一首叫做面向火焰嘅古典音乐，他患有分裂情感性精神障碍同埋强迫症。- CV 糊呀呀

吴冠峰：听呢个病个名都好似好难医㗎噃系咪，咁佢有冇啲咩不寻常嘅表现㗎？

精神病医生：佢觉得自己如果唔系生喺呢个年代，或者可以做希特勒可以做嘅野。 0：26

吴冠峰：你作为青山医院嘅前院长，你点理解佢杀人呢件事呀？

青山医院院长：正常人系好难对父母落手咖，大部分都系有精神分裂症嘅先会咁做，系人格入面，管理道德呢部分失咗效，控制唔到自己，而导致杀人嘅行为。- CV 夜尸0：38

吴冠峰：唔该晒，院长。

音效：转场后庭审讯室 0：55

叶惠萍：佢有病嘅话，其实都系一个受害者啫。

高思钧：照咁个推论嘅话，大部分呢啲同类型嘅case，都只可以被定为误杀。

孙艳娥：个个杀咗人嘅人都话自己有病嘅啦。

叶惠萍：睇佢嘅样又唔系好似喔，边度有精神病人讲大话讲得咁叻呀，仲要呃到佢哥同埋啲警察氹氹转。

郑家雯：美国有个血迹专家去做伪证呀，佢搞到好多个人坐监，其中一个坐咗十九年冤狱。

古嘉欣：啊？个专家点解要咁做啊？

郑家雯：因为佢系专家咯，即系佢太想话畀人听佢系专家喇。

音效：转场法庭 1：38

朱爱伦：你同第一被告嘅会面只得两个半钟？

青山医院院长：会面时间嘅长短，系唔会影响我嘅专业判断咖。1：45

陈玉瑜：案发前几个月，张显宗曾经上深圳玩，咁样似不似系觉得就嚟世界末日喇？

精神病医生：唔似。1：58

陈玉瑜：‘唔似’定‘唔系’啊？

精神病医生：你问我觉得似唔似，我话‘唔似’，亦既系‘唔系’啊。2：02

陈玉瑜：你觉得‘唔系’，咁即系话其实好难分‘觉得就嚟世界末日’，究竟系佢嘅‘谂法’咧，定还是只系佢嘅‘讲法’，用嚟隐藏佢杀人嘅理由，可能只系出于仇恨，或者系谋财害命。

精神病顾问女：根据我嘅观察，第一被告将佢嘅过失归咎于佢嘅父母，佢觉得杀死父母就可以解决问题。 - CV 喵 2：25

精神病顾问男：被告系一个智商127嘅聪明人，不过缺乏同理心，可以话系冷血。 - CV 尧2

朱爱伦：咁佢有冇任何精神病吖？

精神病顾问男：以我嘅诊断，佢只系有人格障碍，系属于极度自恋同极度自大，但唔可以算有精神分裂或者躁郁呢类严重嘅精神病。2：45

精神病顾问女：所以佢系精心策划呢件事嘅，并唔系精神失常。

朱爱伦：点解咧？

精神病顾问女：因为第一被告讲过，佢喺杀父母嘅过程入面，系好平静同自满嘅。

音效：转场后庭审讯室 3：12

古嘉欣：医生唔系专家嚟嘅咩，点解一啲又话有，一啲又话冇嘅？

李建成：呐，假如你系个律师，你会唔会揾个人嚟倒自己米吖，捉只老鼠放入米缸度，拆自己台喔。

孙艳娥：无论有病又好冇病又好，所有人咧都要对自己做过嘅嘢负责任嘅。

高思钧：啲专家肯定要懒有立场咁嘅啦，太多既定立场嘅推断，就会变得好有选择性。

音效：转场法庭 3：42

吴冠峰：喺呢个世界里面有好多所谓嘅‘悖论’，咁多数都喺嗰啲伪科学、哲学或者系宗教层面上面。但系讲到医学，我系会选择相信专业。

音效：转场后庭审讯室 4：00

麦兆雄：其实专家证人嘅意见都只系参考，系咪可信都要靠自己分析嘅。

孙艳娥：欸，总之我唔信喇，如果唔系，佢咁有系统筹谋咁多嘢？哇，仲识得揾记者扮寻亲戏喔。

李建成：佢读书又读一半，供楼又供一半，做咩都半途放弃，咪抵你做咩都失败啦。佢今次扮黐线呢，肯定都坚持唔到落去嘅啦，如果佢肯认嘅哇咧，我反而会佩服佢喔。

古嘉欣：但系如果张显宗唔自爆嘅话咧，啲差人会唔会估到系佢做㗎咧？

李建成：畀差人知道又点吖，有冇证据先得㗎。张显宗第一次同警察录口供嗰时呀，就话佢父母返咗大陆，最多咪报失踪人口？三五七年之后就冇人理嘅啦。

郑家雯：系难啲知嘅，但系可能咧会有啲现场嘅证供，即系譬如话血迹啊，又或者闭路电视啊，咁其实都可以定罪嘅。

麦兆雄：呐，假设佢成功毁尸灭迹，冇咗条尸，都唔知系咪死咗，点证明系佢杀噶？

李建成：咁咪蠢咯，佢录口供嗰时都认晒噶，仲要拉埋个肥仔出来，咁咪正扑街。

麦兆雄：呢啲咪叫‘揽炒’咯。

音效：转场法庭 5：24

陈玉瑜：法官阁下，跟住落来会播放第二被告唐文奇同警方嘅第一次录影会面。

音效：投影设备启动 5：33 （留声机音）

张钊：今日咧系2013年3月15日，呢度系湾仔警察总部，我系侦缉警察张钊。唐文奇，你需唔需要律师陪同。

唐文奇：唔使。

张钊：我宜家向你调查一宗谋杀案件，案件发生喺2013年3月1日，你明白唔明白？

唐文奇：我冇杀过人啊，唔关我事嘎。

音效：暂停播放 6：03

陈玉瑜：法官阁下，我将会播放第七次录影会面，第二被告喺呢次会面入面承认参与杀人。

音效：投影设备启动 6：13（留声机音）

张钊：你宜家系唔系承认同张显宗一齐杀死男子张权贵同埋女子邵雪儿吖？

唐文奇：（哽咽）系，系...

音效：暂停播放 6：26

陈玉瑜：喺唐文奇作供之前，你有冇对佢做出过警诫？

张钊：有。

陈玉瑜：咁即系佢好清楚，自己需要为自己讲过嘅嘢负责，系咪？

张钊：系。

游嘉莉：张钊警长，啲同事叫你做‘沙尘钊’或者叫你‘刀哥’嘅系嘛？

张钊：我嘅名有个‘钊’字，‘钊’字就‘金’字边隔离有张‘刀’。

游嘉莉：所以你就有个绰号叫做‘金刀大侠’喇。

张钊：呵，咁你都查到哇，我nickname嚟嘅啫。喂，呢样嘢同案情无关啩？

游嘉莉：啊冇，想认识你多点啫，哇‘金刀大侠’有杀气哈。咁唔知你办案嘅时候，对住一啲未定罪嘅疑犯系咪都系咁有杀气嘅咧。我嘅当事人即系第二被告唐文奇，佢系喺第七次会面纪录先至认罪嘅，即系2013年3月17号凌晨三点钟左右。

音效：闪回到2013年警局 7：28

张钊：‘系’定‘唔系’啊？

唐文奇：（有气无力）系。

张钊：份文件签咗佢咪得咯，一早认就冇咁多嘢啦。

音效：闪回到2015年法庭 7：41

游嘉莉：你几时拘捕佢噶？

张钊：2013年3月15号上昼十点。

游嘉莉：咁喺你拘捕佢呢41个钟头里边，佢瞓咗几耐吖？

音效：闪回到2013年警局 7：55

张钊：（凶狠）喂！佢话你杀咗人喔，咁系唔系啊？

唐文奇：（有气无力）我好肚饿啊。

张钊：你又眼瞓又肚饿，你顾得边样啊？

音效：闪回到2015年法庭 8：08

游嘉莉：你系咪唔畀佢瞓觉呀？除非佢认罪。

张钊：我哋唔够人手呀。

游嘉莉：将另外一个疑犯嘅录影口供畀第二被告睇，呢种方法叫做cross-serving。

张钊：系，呢个系我哋警方常用嘅盘问技巧。

游嘉莉：张显宗系一个曾经对住全香港讲大话嘅人，点解你会选择相信佢讲嘅嘢呢？

张钊：佢讲嘅嘢符合案情咯。

游嘉莉：啊咁即系话，警方从拘捕唐文奇嗰一刻开始，你哋已经断定佢系有份杀人嘅。

张钊：佢嫌疑最大。

游嘉莉：就算佢讲过几多次佢冇份做嘅，你哋都唔会相信，因为你哋只系得一个目的，就系要逼佢喺48小时之内认罪系吗？

朱爱伦：法官阁下，双方已经承认咗警方嘅录影会面系事实，辩方嘅盘问系错误引导陪审员。

游嘉莉：作为辩方，我系有权挑战证人，至于系咪逼供就要交畀陪审团去判断。唐文奇睇咗几耐张显宗嘅会面纪录啊？

张钊：我无望钟喔，sorry啊。

音效：旁听席一片哗然 9：25

张钊：佢又同条尸一齐几耐啊？两个星期啊？

游嘉莉：唐文奇讲过，畀你哋精神虐待咗一轮之后咧，佢跪咗喺地下嗰度，叫你哋打佢。请问你当时对佢做咗啲咩啊？

张钊：推咗佢一下咯。

游嘉莉：推呀，点样推吖？

张钊：用脚咯，游大状，如果你当事人有认为我打过佢嘅话，佢可以要求验伤。法庭讲证据嘅，我做嘅嘢呢，一切都系跟足程序嘅，嗰份认罪口供佢自己亲手签嘅。

游嘉莉：第二被告认罪嘅时候，佢第一句讲嘅说话就系‘杀人乜都好，我都认’。咁你对于佢呢句‘乜嘢都好，我都认’，你点样理解呢？

张钊：表示认罪。

游嘉莉：你同唔同意，唐文奇系因为觉得佢无论讲啲乜嘢，你哋都唔会相信，所以系喺一个自暴自弃嘅情况底下认罪。

张钊：喺审讯中，我一路都系有警诫佢认罪后果嘅。

游嘉莉：你觉得喺咁样嘅精神状态底下去录口供，对我嘅当事人系唔系恰当咧？呢份口供系咪又系可信呢？

张钊：（犹豫）系。

游嘉莉：张钊警长，你作为人民公仆，你不断喺度颠倒是非，指鹿为马。法庭系一个讲求证据嘅地方，我的确冇办法证明我嘅当事人曾经畀你武力逼供，不过精神嘅折磨，系更加容易令人屈服嘅，法官阁下，我问完喇。

音效：闪回换朱提问 11：07

朱爱伦：陈生，你同第二被告唐文奇，合租过案发单位一段时间，间屋同你住嗰阵有咩唔同？

租客：我记得我入住嗰阵系无微波炉嘅，冰箱就得一个，厨房嘅窗都无用水泥封住。- CV 地心 11：18

商店老板：（耳背）唔该你再大声啲啦。- CV sodawater

朱爱伦：（喊）嗰两个男人喺唔喺法庭度？

商店老板：喺，嗰度。11：38

朱爱伦：点解咁肯定？

二手店老板：嗰个冰箱净系卖佢550蚊，仲要帮佢搬上楼，装好咗可以用了先可以走，又唔畀小费，连罐汽水都冇，我点可能唔记得啊。- CV 湦汐

游嘉莉：你嘅铺头系会帮人搞下维修咁嘅系嘛，你有冇去过案发单位整过嘢？

二手店老板：有，去过三四次，安装过铁闸锁啊咩咁。12：05

游嘉莉：你同警方录口供嗰阵时，讲话买雪柜嗰个人大大只，三廿零岁，一米七高，面上系有暗疮嘅。麻烦你睇下第二被告，佢符唔符合你所讲嘅嗰个人？佢面上有冇暗疮？你之前就已经去过案发单位，亦都见过唐文奇，所以认人嗰阵时就以为系佢。你根本就搞错咗。

二手店老板：我认得系佢。12：40

朋友：肥仔，肥仔话想结婚啊，所以我就同佢介绍咗一个印尼妹。点知越帮越忙，原来嗰个女嘅系有老公嘅，呢件事系我对唔住佢，不过我唔明，嗰个女嘅咁样呃佢，佢仲同佢喺埋一起，真系唔知道佢是傻佬定系好人。 - CV 泷小川

游嘉莉：咁你认为咧？

朋友：憨居咯。

吴冠峰：法官阁下，我冇问题。

游嘉莉：你同第二被告唐文奇先生，喺2007年到2008年系情侣关系，你觉得佢嘅人系点噶？

邓月平：呃，细胆咗啲，但是对人系OK噶。

游嘉莉：咁点解会分手嘅？

邓月平：佢嗰阵做嘢整伤条腰，咁又要揸拐杖，我叫佢睇医生又唔肯睇，涯咗一年咪分手咯，当我对佢唔住啦。

游嘉莉：咁你知唔知佢自杀过？

邓月平：知，不过我都唔知系好彩定唔好彩，佢又死唔去救得翻。

游嘉莉：咁救得返应该系好事吖，点解你会觉得唔知好彩定唔好彩咧？

邓月平：佢嗰件事之后咧，个人冇晒记性嘅，跟住仲要好似有少少低低哋。

游嘉莉：咁有冇啲乜嘢客观事实令你觉得咁样呀？

邓月平：咁嗰阵有个保安公司请佢，咁公司有畀对鞋佢，对鞋就唔啱着嘅，着到佢只脚发晒炎，咁我叫佢去换嗄，咁佢又死都唔肯换。

游嘉莉：咁佢会唔会系嗰种唔好意思麻烦人嗰种人，换对鞋都唔好意思提出嘅嗰种人？

邓月平：嗯～系嘅。

朱爱伦：照你咁讲，唐文奇所有恋爱经历都系被人呃。欸～你唔好介意，我唔系质疑你哋嘅感情。只系你啱啱话，佢整亲条腰唔出去做嘢，点解反而咁要分手嘅？

邓月平：我嗰阵时成日叫佢去睇医生，佢又唔肯睇医生，连饭都系我买埋畀佢食呀，系咪要我出去赚钱养埋佢呀？

朱爱伦：又会咁噶？你话佢好听话，好容易畀人操控嘅喎？

邓月平：佢话工伤之后成个人好冇自信，好惊出街喔。

朱爱伦：工伤，就成个人都变晒，你唔觉得奇怪嘅咩？

邓月平：咁实奇怪噶，所以咪成日都嗌交咯。

朱爱伦：你有冇谂过，其实佢唔去睇医生，系想你一直照顾佢咧？

邓月平：我唔知呀，其实佢份人好硬颈嘅。我有一次唔睬佢，佢喺我屋企门口等到尿急都唔肯去厕所，结果喺屋企门口濑埋。

朱爱伦：咁你有冇当时谂过，佢系特登喺你屋企门口屙尿嘅，等你睬返佢呢？

游嘉莉：法官阁下！

法官：证人可以选择唔回答。

邓月平：唔回答。

吴冠峰：法官阁下，我冇问题。

音效：散场嘈杂 15：59

朱爱伦：（粤语）你真系确定冇其他嘢问嗱？

              （英语）You feel so certain, no other further  questions, huh?           

吴冠峰：我出声嘅话，咪全世界同情佢，我唔做呢啲咁嘅嘢嘅啫。喂，话时话你头先嗰招好嘢喔，釜底抽薪，陪审团听得入耳咧就话受啫，听唔入耳你个人都几刻毒凉薄，你真系。

第七幕

音效：下雨声

新闻：（电台）大角咀杀亲逆子案，今日继续系金钟高等法院进行审讯，有知情人士向我地透露，喺张显宗接受电视台电话公开提醒嘅时候，佢嘅行为就好唔正常，眼神充满晒戾气好似同人有深仇大恨咁，拍摄一结束，就同佢哥哥为咗寻亲嘅事发生争执。 - CV 鱼儿

音效：汽车驶过 0：25

事务律师：唐小姐，之后你就要上庭㗎啦。

唐文珊：你可唔可以同我细佬讲返声，家姐会喺呢度等佢支持佢嘅，唔该晒你。

音效：打雷声 0：41

庭助：court（开庭）！ - CV 冷月

游嘉莉：我嘅当事人即系本案嘅第二被告，选择出庭作供。唐文奇先生，请问你，张显宗系唔系会住喺你屋企㗎？

唐文奇：好少㗎咋，佢当系炮房咯，佢带啲女仔过来先至会喺度㗎。

游嘉莉：咁即系张显宗会通知你，佢要带女仔上嚟咯？

唐文奇：佢会贴一张纸仔，咁我咪走咯。

游嘉莉：你点样形容你同佢之间嘅关系？

唐文奇：佢成日请我食牛扒嘅，仲会买衫畀我。

音效：闪回到2013年 1：24

张显宗：喂喂喂，你睇住，你顺住啲纹，跟住用力咁切落去，咁你咪就切到咯。

音效：闪回到2015年法庭 1：35

游嘉莉：3月4号嗰日你返到屋企，跟住发生啲咩事呀？

唐文奇：我，我返到去之后，我，我闻到好臭好臭，好似死老鼠咁臭呀。

音效：闪回到2013年 1：51

音效：关门声

张显宗：食啦，食完饭帮手搞掂佢。

唐文奇：（呕吐）

张显宗：：间屋你嘅，你点都走唔甩嘅喇。

唐文奇：（转身要走）

张显宗：喂，我见过你阿妈同家姐嘅喎。

音效：闪回到2015年法庭 2：11

游嘉莉：你惊佢伤害你屋企人？

唐文奇：我，我自己条命我可以唔要㗎，但系，但系我唔想佢伤害我妈咪同埋家姐呀。

游嘉莉：咁之后张显宗叫你去做啲咩呀？

唐文奇：佢叫我包好晒啲手手脚脚，跟住攞去揼咗佢咯，佢仲一直咁闹我。

游嘉莉：咁你自己一个人喺屋企，对住嗰啲手手脚脚，你惊唔惊呀？

唐文奇：惊啊！惊啊！我仲会发啲好恐怖嘅梦㗎，我梦到只蜘蛛追住我啊。

游嘉莉：咁之后呢，佢再叫你做啲咩啊？

唐文奇：佢叫我每日都要喷香水咯，同埋买单车返嚟咯。

游嘉莉：咁之后你嘅好朋友阿宗，叫你点处理嗰啲手手脚脚咧？

唐文奇：佢叫我自己返大陆揼咗佢咯，佢话过关畀人问就话系腊肉咯，我，我话我唔肯呀。

游嘉莉：咁你之后仲有冇打返电话畀佢呀？

唐文奇：冇呀，我，我好惊㗎。我惊佢搞我家姐同埋阿妈呀，我剩系得喺张床度打震呀。

游嘉莉：咁之后警察带你走嗰阵时，你觉得点样呀？

唐文奇：警察嚟嘅时候，我，我成个人都好似轻松晒咁咯。

游嘉莉：咁你开头同警察讲，话你冇杀人，但系你之后又话有，咁点解咧？

唐文奇: 我话我冇杀人㗎，佢哋又唔信我，净系信晒阿宗讲嘅嘢。佢哋话，我认咗罪就可以瞓觉喇，咁我咪认咯。

游嘉莉：你知唔知你咁样认咗罪系好麻烦㗎？

唐文奇: 我唔知呀，我净系知到我冇觉可瞓嘅咋，我真系好想瞓觉呀，但系嗰个阿Sir都唔听。佢仲攞烟头弹我呀，跟住仲喺度话，‘你先杀死佢老母邵雪儿，跟住咧仲杀埋佢老窦张权贵，系唔系吖？’咁样喔。跟住佢仲话要整嗰个咖啡泡饭畀我食咯，话食咗唔只唔会肚饿，仲包管唔眼瞓添。

游嘉莉：咁你有冇食呀？

唐文奇：有啊，我好肚饿，我仲话，‘我最钟意食咖啡泡饭㗎，你打我啦，打我啦’，之后佢踢咗我一脚，话‘你发颠呀？你咁样系吓唔到我㗎！’

游嘉莉：法官阁下，我冇嘢问喇。

音效：转场 5：03

吴冠峰：喺案发前几日，即系2013年嘅2月25号，你辞咗份保安嘅工作系咪？

唐文奇：系呀。

吴冠峰：因为佢嗰一日咧，张显宗同你讲，话佢爸爸妈妈终于应成咗嚟案发单位，你辞咗份工就系为咗准备个杀人计划，系唔系？

唐文奇：（激动）唔系呀，唔系咁㗎，系佢，佢逼我辞职㗎咋，佢打电话去我公司度烦我呀。

吴冠峰：3月1号张显宗喺案发单位度逗留嘅时间大概系20分钟左右，你返去咧又见唔到啲尸体，呀，咁唔通系有第三个人负责处理啲尸体咩？

唐文奇：（激动）我唔知道啊，我唔喺度啊，我都唔喺嗰度。

吴冠峰：会唔会系你有份参与杀人同埋分尸咧？

唐文奇：我冇啊。

吴冠峰：将嗰啲残肢放入嗰个冰箱里面。

唐文奇：唔系！好！你哋屈我，屈我屈我咯！我，我冇问题㗎，我冇问题㗎！

吴冠峰：张显宗嗰啲刀伤系你整㗎？

唐文奇：佢都冇讲过，我系喺警察嚟到我先知㗎，我又唔系生神仙，我又冇千里眼，我点知咁多嘢啫？

吴冠峰：你冷静啲先喇，成件事由头到尾根本就系你嘅主意，系你想杀佢父母。

音效：闪回2013年小吃摊 6：45

张显宗：有阵时我真系好想好似你咁样，昂勾勾，几开心嘅。

唐文奇：（边吃边说）你都得㗎。

张显宗：咁~似我呢啲人，唔系好早死，一系就会发癫。我谂过㗎，我想30岁之前自杀，我会喺屋企度割脉，等啲血喷到成间屋都系，度时候间屋变成凶宅之后，我睇佢哋点卖出去间屋。

吴冠峰：系你教唆佢杀佢父母，你当嗰次系一个预习，跟住你同佢讲，（唐文奇同入）横掂都系死，杀人都系死，不如杀人啦？...

唐文奇：横掂都系死，杀人都系死，不如杀人咯？带多几个人落去，我想试下，真系杀人会点，但今次咧就当系彩排，如果成功咧，我哋就去深圳杀更多嘅人。

音效：闪回到2015年法庭 7：48

吴冠峰：你知道佢谂住自杀，佢一定会答应你咁做，置之死地而后生呢一招你最叻㗎啦。

唐文奇：我冇啊，我冇讲过，我有劝佢㗎，嗰阵佢话佢好憎佢阿爸阿妈，话杀死佢哋之后就自杀，我有叫佢唔好咁做㗎，真㗎。

吴冠峰：张显宗同你讲佢要自杀嘅时候，你系唔系同佢讲过，话叫佢拉多几个人落去。

唐文奇：我~ 我冇同佢讲过自杀呀，我自己都自杀过啦，系唔系自杀过一次就会死吖？

音效：闪回2013年小吃摊 8：32

张显宗：我想喺30岁之前自杀，我会喺屋企嗰度割脉，等啲血喷到成屋都系，我睇佢哋点卖出去间屋。

唐文奇：你咁劲，使咩要自杀喔，死有咩用啊，死咗咩嘢都唔知，其实你比我好好多嘅喇，起码你有憎嘅人，我都唔知我可以憎边个，我憎我自己咩？

张显宗：横掂都系死，杀人都系死，不如我哋杀人啦，拉多几个人落去陪葬，杀完佢哋两个人之后，我哋返大陆继续咧。

音效：闪回到2015年法庭 9：21

吴冠峰：你用自杀呢单嘢嚟威胁佢哋，等大家觉得内疚然之后帮你做嘢，其实你唔惨呀，你扮嘢啫，你真系几聪明㗎，识得以退为进，你以弱者嘅优势反败为胜。

唐文奇：我冇呀。

吴冠峰：原来系你先系做紧个《Catch me if you can》。

唐文奇：我冇我冇呀。

吴冠峰：你唔好以为你肥咗我就认唔得你，迪卡比奥。 

游嘉莉：法官阁下，我认为吴大状用嗰啲假设性嘅问题，向我当事人施压，系相当唔恰当嘅。唐文奇又唔识得佢爸爸妈妈，又同佢哋无仇无怨，佢做咩要杀佢哋呀？

吴冠峰：因为佢同张显宗一样吖嘛，觉得全世界都睇佢唔起，个个都虾佢，佢仲care呢个世界乜嘢啫？死多几个人又有咩所谓㗎，最紧要系有人陪佢一齐癫唧嘛，大家一齐上咯。

游嘉莉：唐文奇系成件事嘅主谋？蠢嗰个会教返精嗰个转头？

吴冠峰：叻嗰个唔系咩事都叻晒，蠢嗰个只需要做啱一件事就有赢面㗎啦，只要前面冇嘢阻住，将军都可以飞过去对面食咗人哋个帅呀。

音效：转场庭外 10：48

贺敏儿：头先你一直咬住唐文奇唔放，你系咪有啲咩策略可以帮到张显宗吖？

吴冠峰：你有冇发现我问唐文奇嘅时候，张显宗有咩反应？坏人讲真话嘅时候可以好serious嘅，就好似我而家咁样呀。

贺敏儿：所以你系觉得唐文奇一定有份杀人，唔希望佢冇罪。

吴冠峰：本来1打2，而家2打1。你估游大状顶唔顶得顺㗎啫？游嘉莉尊贵资深大律师噃。

音效：转场办公室 11：22

朱爱伦：（粤语）今日有冇睇到陪审团嘅反应呀？

              （英语）Did you see the jury's face today?

陈玉瑜： （粤语）佢哋似乎都企晒喺唐文奇嗰边噃。

              （英语）It seems they're already on his side.

朱爱伦：（粤语）系喇，佢哋畀说服，觉得个肥仔系畀人被逼认罪嘅 ，个肥仔诈傻扮得几似。

              （英语）Yeah, they're convinced he was coerced into a confession, 个肥仔诈傻扮得几似。

陈玉瑜：系啊。

朱爱伦：（粤语）呢度我哋证明佢参与咗几多系关键。

              （英语）We need to prove somehow he is just as guilty.

陈玉瑜：（粤语）系嘅，但我哋呢度咪已经有好多证据咯。

              （英语）Well, there's a lot of evidence for that.

朱爱伦：（粤语）令佢哋相信呢啲至系个关键。

              （英语）Yes, but getting them to believe it,that's the hard part.

音效：转场探视室 11：54

唐文珊：细佬呀，你要留心听我讲。

唐文奇：啊？又嚟呀，我记唔到好多嘢呀，我个脑就嚟爆喇。

唐文珊：你系咪又讲唔听呀？

唐文奇：唔系。

唐文珊：跟住做就得㗎喇，家姐做所有嘢都系为你好呀，记得了啩？

音效：闪回到2015年法庭 12：18

朱爱伦：点样解释你哋去买咁多把刀？

唐文奇：我唔知有咁多把刀喔，佢话今晚煮牛扒畀我食，佢话屋企嗰啲唔啱用嚟切牛扒喔。

朱爱伦：你买4把刀系用嚟招呼人，包括佢阿爸阿妈，系咪？

唐文奇：我仲问佢买咁多把刀嚟做咩呀？佢话你唔使理啦，又唔系你畀钱。咁系佢畀钱，又唔系我畀钱，咁系咪先？

朱爱伦：啊，咁屋企所有嘢都唔系你买嘅？

唐文奇：哦唔系呀，砧板嗰啲系我买嘅。

朱爱伦：请陪审员打开个folder，睇一睇P44证物。你，即系Angus Tong同张显宗Henry Cheung，嘅MSN对话里面有讲到，‘一日揾唔到，一日都唔知ABC已经X咗’。请问X系乜嘢意思？边个系ABC？

唐文奇：我唔知喔，我嘅英文名系Angus Tong，系我家姐帮我改嘅，但系我冇同佢用过MSN喔。

朱爱伦：你哋嘅呢个对话呢，有晒纪录㗎！

唐文奇：我好耐冇用过 MSN 喇，同埋我电脑系冇密码嘅，即系阿宗可以走入嚟用我嘅电脑，用我嘅 MSN 㗎。

音效法官：我提醒第二被告，呢啲对话记录系双方律师都同意嘅案情，你都签名确认咗。- CV 湦汐 13：47

唐文奇：我都唔知我签咗啲咩，嗰啲律师叫我签，我咪就签咯。

朱爱伦：你喺度扮无知。

唐文奇：我唔系无知，我知。

朱爱伦：案发之后嗰几日，你都喺屋企，你会唔知道有两个人头喺个雪柜度？

唐文奇：我冇打开过雪柜喔，我都唔知入边有咩，我肚饿喇，我咪就落街买嘢食咯。

音效：转场 14：23

吴冠峰：唐文奇先生，请问你点解会将屋企啲窗用水泥封晒？

唐文奇：我疴屎嗰阵时，嗰啲老鼠成日会由啲窗条喇度爬入嚟，佢食得好似好滋味咁喔，咁我又冇钱去整返好佢，所以我咪封咗佢咯。

吴冠峰：咁如果唔系唔想畀人知，里面发生紧咩事咧，点解要咁大件事用水泥嚟封窗咧？即系例如话杀人？

唐文奇：你，你系唔系要帮我食晒啲老鼠吖？

陈玉瑜：请各位睇下P46证物，喺你住嘅单位里面揾到一张纸，上面写住张显宗喺西营盘屋企嘅地址、大门密码、同埋两位死者嘅名，你知唔知有咩用？

唐文奇：张纸唔系我㗎，我唔知呀。

陈玉瑜：张显宗唔需要睇呢啲嘢啫，佢就系写畀你睇嘅。

唐文奇：佢可以系写畀我嘅，但系我真系冇睇过呀。

陈玉瑜：咁喺你屋企入面发现嘅嗰本红色簿，上面写住，‘肉、骨、9日完；12小时，剃毛、切内脏送尸去鸟巢’，咩意思呀？

唐文奇：我唔知咩意思呀？

陈玉瑜：呢啲系你嘅字迹嚟嘅。

唐文奇：佢系打开完个胶箱，佢叫我跟住抄，我咪系咁抄咯。我冇读过咩书呀，我唔知咁多嘢㗎。

吴冠峰：唐文奇先生，你同警察讲过话：‘同阿宗一人一件，斩开一嚿一嚿，同埋煲肉。’你记唔记得你讲过以上嘅说话呀？

唐文奇：我记得呀，我系跟住电视机嗰饼录影带，阿宗咁讲，我就跟住佢咁讲唧嘛。我嗰阵净系好想瞓觉，我喺度发脾气呀。

吴冠峰：即系发脾气就可以讲一啲唔需要负责嘅说话系咪呀？咁我想问你，你宜家系咪发紧脾气呀？

唐文奇：如果你宜家觉得我系发紧脾气嘅话，你可以罚我，我就接受咯，我冇办法噶。我知道错㗎喇，如果你想屈我，你就屈我咯，我ok㗎。

吴冠峰：喺你作供之前，警察有冇警诫过你？

唐文奇：其实佢讲过啲咩，我我我...唔系好记得喇。但系我有点头咯，但系，我真系冇记过佢讲过啲咩嘢呀。

吴冠峰：法官阁下，我冇问题喇。

音效：转场 17：02

游嘉莉：陈医生，请问你同佢会面总共几个钟头吖？

陈医生：接近200个钟。- CV 白白胖胖的 17：08

游嘉莉：根据你对佢嘅观察，你觉得唐文奇系个点样个人咧？

陈医生：唐文奇并无任何嘅精神疾病，他嘅智商得84，操作智商同语言智商系有明显嘅差距咖。17：17

朱爱伦：唐文奇嘅智商系比平均数值低，但系低到乜嘢程度呢？你肯定佢系唔清楚杀人系乜嘢一回事？佢唔会攞起刀插入人哋嘅身体咩？

陈医生：呢个...我唔可以好肯定咁回答你。17：41

游嘉莉：你认为以唐文奇嘅能力，有冇可能处理一个咁复杂嘅杀人计划咧？

陈医生：我认为呢个案嘅复杂程度，已经超出咗唐文奇智商可以处理嘅能力范围了。 17：54

游嘉莉：唐小姐，请你简单描述下你嘅家庭背景。

唐文珊：我同我嘅细佬唐文奇，我哋一直以来都系相依为命嘅，我老窦好早就走咗嘅喇，我妈妈由早到晚都要返工，一路都只系得我哋两个人。

游嘉莉：咁唐文奇佢细个嗰阵系点样嘅？

唐文珊：佢系好单纯嘅，如果有人畀少少嘢佢食嘅话，佢都会觉得对方系个大好人咯。

游嘉莉：如果佢畀人虾，佢会唔会还击呀？

唐文珊：（哽咽）我都想佢识得还手，但系佢唔想人哋唔中意佢，咁佢就会委屈自己唔会反抗，我成日同佢讲，你唔可以当各个人都是你嘅好朋友，咁会蚀底嘅。

游嘉莉：你会唔会觉得佢蠢呀？

唐文珊：唔系，但系…我觉得佢喺沟通上边有少少唔好咯，同埋又或者人哋讲嘢嘅时候咧，佢未必明得晒。

游嘉莉：佢曾经自杀过嘅，系咪你救返佢㗎？

唐文珊：（哽咽）佢喺医院嗰度，捱咗十几日先执返一条命。佢由细到大，佢都唔带眼识人嘅，我都只不过搬咗去同男朋友住咗一阵啫，我冇同佢一齐住，睇少咗佢一阵嘅唧，佢就搅成咁，今次又是喔。

游嘉莉：点解咁讲呢？

唐文珊：（哭）佢，佢睇到嗰啲残肢嘅时候，原来有打过电话畀我，但系我冇接到。我细佬佢…佢佢智商系唔高嘅，佢又冇记性，咩都惊，由细到大都系因为有我喺佢身边照顾住佢，佢先至唔会畀人虾唧嘛。后尾我哋分开住，佢越来越少嚟揾我，我以为佢终于都大个咗喇，佢…佢独立喇，点知佢识咗呢个衰人呢，佢畀人利用佢自己都唔知呀。你点解，要，要我细佬陪葬吖，点解吖？

朱爱伦：（打断）法官阁下！

游嘉莉：（紧接入）法官阁下，我冇嘢问喇。

音效：转场 20：41

吴冠峰：啱啱听你讲，你同你细佬嘅关系，好亲密系咪呀？

唐文珊：咁一定系㗎，我净系得呢一个亲细佬嘅唧。

吴冠峰：可唔可以咁讲咧，为咗帮你细佬，为咗可以令佢唔去坐监，你会不惜一切。

游嘉莉：法官阁下。

吴冠峰：法官阁下，我只系想指出，证人同第二被告嘅关系，系亲人，佢嘅作供系会有偏颇。我唔系话佢讲大话，不过身为姐姐嘅佢，可能会情愿相信佢个细佬系从来冇长大嘅。

唐文珊：（哭）你觉得，你觉得我喺咁多人面前话佢低能，你觉得我心入边系会好好过嘅咩？

吴冠峰：唐小姐。

唐文珊：（哭）就嚟母亲节㗎喇，我哋每一年母亲节都会一齐整蛋糕，我哋一齐庆祝好开心嘅，但系呢两年每逢大时大节，我就同我阿妈讲话我细佬出咗去做嘢呀，我一直呃佢，我话细佬唔得闲冇办法陪佢。咁我…我想问下，跟住呢一年我点样继续呃落去呀，你话我知吖？

第八幕

庭助：本人李玉兰谨郑重至诚，据事实声明，本人将竭尽所能维持陪审员聚埋一齐，以及唔受外界嘅骚扰，我本人都唔会系退庭期间 对案件向陪审员做出任何评论。 - CV 冷月

法官：请陪审团退庭商议，多谢各位。

音效：脚步声 0：20

李建成：张显宗有冇罪唔系仲要倾吖嘛？

叶惠萍：（不记名投票）有罪，有罪，有罪，噢，冇罪？

孙艳娥：好好玩啊？边个投㗎？？

郑家雯：我觉得冇必要知啫，投咗未投咗咯。

李建成：我觉得有必要喎，万一下一铺佢又玩嘢咁点算啊？ 

麦兆雄：乜玩嘢？

高思钧：其实我哋一早就讲好咗要投暗票嘅，唔讲都好正常。

孙艳娥：哎，你哋三个啦，成日都话了解凶手，系唔系你哋当中有人想放生佢啊？

李建成：有个人咧一早就话唔系好信呢个制度，跟住咧就鬼死咁多古仔讲。啊，你同佢都系希特拉嘅嗰啲粉丝嚟嘅噃。

高思钧：我只系同希特拉一样，都会睇尼采嘅书。

孙艳娥：郑小姐？

郑家雯：虽然我冇义务讲，不过如果系我投嘅话咧，我一定会同大家交代嘅。

李建成：做乜啊，敢做唔敢认啊？

何富：系我投嘅！

孙艳娥：啊？你做乜要咁做啊？

何富：我投乜嘢有我自由。

叶惠萍：何生啊，你唔好介意喔，你点解要咁投嘅？

何富：总之我觉得应该投佢冇罪。

麦兆雄：你投乜嘢咧其实冇所谓嘅，不过你可以讲下你嘅理据畀大家知道，可能我哋会转軚咧。

何富：我冇嘅喎。

孙艳娥：啊你即系乱嚟啫？

何富：佢使唔使坐监唔关我事嘅，头先讲，你哋又唔听，宜家又嚟问。多我一票都唔会影响个结果嘅啦，你咁紧张做咩啫。

古嘉欣：虽然咧，我唔系好似何生咁投咗佢冇罪，不过其实嗰啲理据，我自己都唔系太清楚嘅。

麦兆雄：咁你又凭咩准则去投票咧？

古嘉欣：凭~ feel啰。

麦兆雄：你哋唔好咁好唔好啊，我哋嚟系做陪审员啊，唔系城市论坛嗰啲维园阿伯啊。

郑家雯：其实嚟咗咁多日咧，你哋知唔知自己嚟做乜嘢嘅咧？

古嘉欣：今次都系我哋第一次做陪审员啫。

郑家雯：但亦都有可能系最后一次啰，完咗今日你可以继续赌马，可以继续饮茶，整指甲，是但啦。

叶惠萍：唔好讲咁多啰，我哋快快点埋嗰两张票讨论唐文奇喇，好冇啊？

高思钧：好，我嚟啦，有罪，有罪，7:1.

李建成：好下一个。

音效：转场 3：16

麦兆雄：宜家可以肯定嘅系，张显宗佢逗留喺现场嘅时间系都20几分钟，系未够时间杀两个人咧？

古嘉欣：系未够时间杀两个人咧？

叶惠萍：咁又唔好limit咗一个人嘅极限。

麦兆雄：咁杀人一个都可以到吖，咁分尸咧？唐文奇话佢当日返到去见唔到尸体喎，喺咁短时间要分尸同埋清理现场，应该冇乜可能。

李建成：都唔需要第一时间搞掂佢嘅啫。

麦兆雄：呢啲都只系你嘅推测啫。

郑家雯：肥仔喺案发之前打畀朋友话有大单嘢要做，大单嘢会唔会就系杀人咧？个笔记上写咗张显宗屋企地址、大闸密码，仲有两老嘅名，张显宗使唔使写呢啲嘢㗎？上边仲有杀人计划嘅预算同埋支出，唐文奇以前做咩㗎？会计呀嘛！仲有好多嘢㗎，唔该大家谂下啦。

麦兆雄：就算唐文奇有份策划，杀人嗰阵证明唔到佢喺现场，都系冇用啊。

孙艳娥：如果我哋判佢有罪咧，佢坐监坐成世㗎，反正佢智商又唔高，我谂佢唔会重犯嘅。

李建成：真系傻至好，扮精难，扮蠢易啊。

郑家雯：美国有个连环杀人犯咧，叫 Ottis Toole ，IQ 得75 㗎咋，60至80年代，佢涉嫌参与超过100宗谋杀案。

李建成：嗱嗱嗱，杀人，弱智都做到㗎。喂靓妹，出句声讲下嘢啦。

古嘉欣：我觉得咧，如果唐文奇真系坐监嘅话，佢阿妈真系会好惨㗎，即系好似我妈成日同我讲，话如果我到时嫁咗人嘅话，佢真系唔知点算㗎。

何富：系咯，如果条肥仔踎成世，咁佢老母未临老过唔到世，单嘢横掂都叫做已经有人孭咗喇，算啦，恻隐之心...

郑家雯：人皆有之嘛，但系你讲嘅所有嘢咧，都系令唔到你make呢个decision㗎噃。

麦兆雄：嗱嗱嗱，我要提一提大家嗄，觉得肥仔惨系一回事，佢有冇杀人又系另一回事，宜家系要理性处理。

何富：唔讲又话唔讲，讲咗又话唔啱。

孙艳娥：咪系啰，宜家啲后生真系好难服伺嘅喔，有罪又拗一餐，冇罪又拗一餐，我真系唔知你哋谂乜嘢嘅噃，不如你话我听，我跟啰。

叶惠萍：大家唔好唔记得，佢仲有一个家姐㗎，我唔系想大家同情个肥仔，咁但是唐文奇曾经自杀过，佢好难得至执返条命㗎，我哋系唔系唔应该咁轻率咁判断一个年轻人嘅生死呢？

高思钧：个重点咧，其实就唔系佢有罪定系无罪，而系我哋嘅决定有冇经过思考，定系只系用我哋嘅主观感情、个人喜恶嚟作出呢个决定？

李建成：你唔好同我哋讲埋晒啲咁抽象嘅嘢呀，一句到尾，公道自在人心，我净系信我自己㗎唧，我哋倾咗好耐㗎喇，仲有乜嘢好倾吖？投票啦。

叶惠萍：嗄，喺投票之前咧，我想讲啲嘢。

麦兆雄：sure，你有咩谂法呢？

李建成：有嘢你就讲啦。

叶惠萍：呃~我以前系老师，我宜家退咗休，系一个普通嘅师奶，无端端收到法庭寄嚟嘅信，我就嚟咗呢度做陪审员喇，我平时睇嗰啲死人冧楼嘅嗰啲新闻呢，我都系当故仔咁睇，我行街买餸见到啲血淋淋嘅嘢，我都会兜路走㗎，我乜嘢都唔识，我有乜嘢资格判人哋生死啫，呢几日听咗咁多嘢，好似睇咗成场戏咁，我唔系觉得个肥仔一定有份，而系有啲嘢，我真系谂极都谂唔明，个肥仔，可以学个沙展讲嘢，讲得咁似嘅，佢讲嗰泡尿啊，佢系唔系真系忍唔住啊？定系特登㗎？唐文奇，其实系唔系真系咁简单？

麦兆雄：呢啲系你嘅推测吒嘛。

叶惠萍：系，我明白。疑点利益归于被告，咁但系我又谂喎，张显宗既然承认咗谋杀，拖个肥仔落水对佢冇好处㗎噃，只会令到佢形象受损，仲难减刑啦？虽然佢系杀人凶手，但系唔代表佢会讲大话㗎。喺法律面前，唔系人人平等㗎咩？

高思钧：穷人含谂呀。

叶惠萍：点都好啦，我都系想大家认真地考虑投嗰一票啰，最紧要，系要对得住自己。

孙艳娥：你讲得好好呀。

古嘉欣：到咗宜家竟然有啲唔舍得。

高思钧：都未迟吖。

音效：转场到法庭 8：40

法官助理：第一被告张显宗被控谋杀张权贵同邵雪儿，陪审团你哋系唔系已经有决定？

麦兆雄：系。

法官助理：你哋嘅裁决是否一致？

麦兆雄：否。

法官助理：裁决比数系？

麦兆雄：7:1。有罪

音效：哗然 9：01

张显宗：你睇下，有一票喎。

音效：转场 9：06

法官助理：第二被告唐文奇被控谋杀张权贵同邵雪儿，陪审团你哋系唔系已经有决定？

麦兆雄：系。

法官助理：你哋嘅裁决是否一致？

麦兆雄：是。

法官助理：裁决嘅结果系？

麦兆雄：冇罪。

音效：哗然 9：25

法官：第一被告张显宗，系一个极度危险嘅人物，聪明、善于操控他人，咁多年嚟父母对佢供书教学，佢用咗6个月嘅时间计划杀人，而且至今冇悔意，根据案例，判终身监禁。第二被告唐文奇智商较低，一直被张显宗利用，佢只需要就阻止合法埋葬尸体罪，判囚一年，而被告被还押时间已经超过两年，散庭之后可以攞番自己嘅物品，离开。就今次本案警方处理录影会面嘅方法，喺未有证据显示被告人有份参与杀人嘅情况之下，审问咗接近41个钟，而且冇得休息，系对被告人十分唔公平，我认为警方需要认真检讨。

法官助理：Court（退庭）。

记者：张显祖先生，你对呢个结果有咩要讲啊？- CV Sodawater 10：24

游嘉莉：你哋都知道呢度唔得影相㗎啦，我哋落去先倾好唔好啊，落去先倾。

朱爱伦：喂，一个一个嚟。

记者：你点睇法官系庭上再次批评警方录口供嘅方式？- CV 冷月 10：34

朱爱伦：（粤语）我尊重法官嘅决定，但我想强调嘅系，唐文奇嘅口供，其实在开始就已经被裁定为一个有效证供嘅喇。

              （英语）I respect the judge’s decision, but at the same time, I want to emphasize that Tang’s statement with the police was deemed admissible from the very start.

记者：（远音）张先生而家你屋企就剩低两个人，有咩打算啊？- CV Sabrina 10：47

张显祖：我会行到落去嘅，唔该。

记者：请回应一下啦，讲多两句。- CV 雪雪

记者：请回应一下，请你回应一下。- CV 尧2

唐文珊：唔该借借，唔该借借。唔好影，唔好影吖，唔该。

记者：你觉得呢次嘅判决公唔公正啊？- CV Sodawater 11：04

游嘉莉：我认为陪审团嘅裁决，体现咗香港司法制度嘅公平，法院嘅公正。其实我个人就唔系好关心有冇大胜嘅，最紧要就系我可以尽力咁帮助到我嘅客户。

音效：关车门 11：25

吴冠峰：使唔使咁好戏啊？上晒身咁样。

贺敏儿：师父呀，但系你有冇啲失望啊？

吴冠峰：justify佢杀人嘅理由，唔知算系买庄定系买闲咧，喺法庭度讲下真话有阵时都几好嘅，啊~ 好似谂到啲嘢，学到啲嘢咁样，又睇到啲嘢，输唔晒，有赚嘅。哎~有阵时望到呢件嘢（律师头套），系唔系戴咗呢件道具就唔系自己？我原本谂住呢几年咧接少啲case，然之后同我两个老细周围去下，喂你点知呢度听晚会发生乜事啰，系未先？

音效：汽车驶过 12：09

郑家雯：我以为你会投肥仔有罪添。

叶惠萍：我谂过，最后我唔希望用自己嘅感觉投嗰一票，法庭始终都有佢嘅规矩嘅。

郑家雯：排除所有合理疑点。

同入：（欣慰地笑）。

音效：狱车开走 12：30

高思钧：97你冇走，如果到时有乜改变，你走唔走啊？

李建成：如果香港变得好似上面咁嘅话咧，我就直头上去做生意，食脑就得啦。

麦兆雄：还唔快啲嗌契爷。

高思钧：（笑）契爷。

何富：（笑）契爷。

麦兆雄：契爷哈哈哈。

大伙同笑：哈哈...。

音效：闪回到2012年面试现场 12：53

唐文奇：我不见啦，请你请佢都不会请我啦。

张显宗：（粤语）有证书又代表唔到乜嘢。

              （英文）Certificate doesn't mean anything.

唐文奇：乜嘢哇？

张显宗：（粤语）有证书又代表唔到乜嘢，佢又唔会畀到你IQ。

              （英语）Certificate doesn't mean anything. It won't get you intelligence.

唐文奇：咩意思啊？

张显宗：即系读万卷书不如行...

唐文奇：（打断，打趣的口吻）食万宝路吖嘛。

张显宗：（笑）万里望啊。

唐文奇：万里望？花生？少少咸嗯嗯，多多脆嗯嗯，（张显宗同入）饮番杯一定要食佢，金龟唛万里望花生，哈哈哈。

张显宗：饮番杯一定要食佢，金龟唛万里望花生，哈哈哈。

前台：喂，可唔可以安静少少啊？有人喺度面试啊。 - CV 雪雪 13：28

张显宗：in 紧人？interview 都打尖噶？喂！内定嘅？内定就唔好嘥人时间吖嘛。走！

唐文奇：啊？

张显宗：行啦。

音效：闪回到2015年监狱探视节奏慢 13：43

张显宗：呢排咧，呢度嚟咗个鬼佬喔，怼冧咗两件印尼鸡嗰个啊 ，IQ有137，嗰啲扭记成日拿我嚟同佢比，喂你知唔知佢个单位变咗凶宅之后跌咗几多啊？

张显祖：阿妈阿爸份遗嘱，留了两层楼畀我（停顿一下）同埋你。

张显宗：（看着哥哥5秒）（笑）你同我讲呢啲有乜用啫？佢哋人都死咗啦，我又出唔返去。

张显祖：佢哋冇偏心。（冷笑）呵，做人真系辛苦啊，亲人走先，自己难过...

张显宗：（打断）自己走先又怕亲人难过...

张显祖：啊~你个人好像乜嘢都知咁样喔，不过咁，你冇feel嘅（苦笑）哈哈哈。恭喜你，哈哈哈哈，不过你咩都feel唔到，你知咁多嚟干咩啊？（停顿5秒）我律师...叫我...取消你遗产执行人嘅资格。

张显宗：（停顿5秒）乜你觉得我宜家仲会care咩？咁未好咯，最后当益咗你，咁未为你做件好事咯。

张显祖：（压制怒火）你，真系觉得自己一啲都冇做错？你仲有大把时间，你慢慢谂清楚。

张显宗：（无所谓）有时间唔一定谂㗎，后悔冇意思㗎，改变唔到个结果㗎。你讲得啱，真系棘住喺嗰两步走唔到。

音效：挂了话筒 15：35

张显祖：（失望）

张显宗：喂？喂...（不停拍玻璃）喂...（慌神）（哭）（压音效）

狱警：诶冷静啲。诶，冷静啲，带走。 - CV 湦汐

音效：转场次日 15：56

女记者：你宜家有咩感觉啊？

唐文奇：我觉得自己好似发紧梦咁样咯，即系一直都未瞓醒咁样。

女记者：咁你宜家瞓觉咧会唔会发噩梦呀？

唐文奇：会啊，我会成日都发噩梦啊。哦~我会发到呢…嗰啲手啊，同埋阿宗嘅样呀。我会发梦，梦到嗰啲大蜘蛛追住我呀，好多毛㗎。

女记者：咁你宜家惊啲蜘蛛多啲吖？定系惊阿宗多啲呀？

唐文奇：惊阿宗。

女记者：你系唔系都有开解阿宗呀？

唐文奇：有㗎，我有开解佢㗎，我成日叫佢唔好乱谂嘢啦，佢爸爸妈妈都好惜佢，只系唔知点样惜佢啫。

女记者：你有冇嬲自己呀？

唐文奇：我一直都好嬲自己咯，我成日乱发脾气呀，我做错咗好多嘢咯我。

女记者：会唔会嗰两个死者有返条全尸，你会觉得安乐啲呀 ？

唐文奇：咁又唔会话安乐啲㗎，即系指...嗯...好似会好啲咯。

女记者：你会唔会觉得对唔住佢爸爸妈妈？

唐文奇：对唔住就冇咯，但系如果你话可以揾得返啲畀阿宗掟咗落海嘅手手脚脚，咁会好啲咯，但系揾唔返，我都冇办法咯。

꧁༺ - The End - ༻꧂         

写在最后：